Yadira Reimúndez logrou na súa participación nos Multi European Games de Sofía o primeiro posto no seu peso, -55kg, gañando así a clasificación para o Europeo sub21 e o Europeo Júnior de Pesos Olímpicos. Coa participación da deportista do Mat’s finaliza a participación da selección galega júnior da Federación Galega de Taekwondo, que rematou na segunda posición por equipos.
A galega tivo unha actuación espectacular con cinco triunfos en cinco combates axustados e de enorme concentración, o que lle permitiu acadar a medalla de ouro.
As rivais de Reimúndez
Na primeira rolda a súa rival foi a grega Oraia Lallou Paraskevi, nunha loita durísima que se decidiu no punto de ouro. A continuación, Reimúndez enfrontouse á turca Sude Demiralp á que a taekwondista venceu con facilidade cun 1-15.
Con esta vitoria pasou aos cuartos de ifnal, onde agardaba a croata Rea Kozlica, que tampouco foi quen de vencer á galega, nun axustado combate que finalizou no 6-4. Na semifinal, a rival foi a croata Petra Savija e novamente Reimúndez venceu nunha proba igualada, rematando no 0-3.
A final foi un combate a sangue frío e moi psicolóxico para as dúas taekwondistas. A galega enfrontouse á francesa Julie Nguyen (campioa cadete de Europa no 2020), á que eliminou no punto de ouro (4-2).
