- Xunta defende ao piragüismo galego como potencia mundial e solicita “un trato igualitario” para os padexeiros galegos Teresa Portela, Rodrigo Germade e Carlos Arévalo ante “as situacións inxustas que están a vivir”
O secretario xeral para o Deporte, José Ramón Lete Lasa, acompañado do delegado territorial da Xunta en Lugo, Javier Arias, mantivo unha xuntanza na mañá de hoxe cos padexeiros galegos e medallistas olímpicos, Carlos Arévalo e Rodrigo Germade, na que tamén estivo presente o presidente da Federación Galega de Piragüismo, Alfredo Bea. Alí, Lete Lasa defendeu os intereses do deporte galego, “que leva tantos anos demostrando que é unha potencia mundial en piragüismo” e reclamou ante a Real Federación Española de Piragüismo (RFEP) e o Consejo Superior de Deportes (CSD), aos que se dirixirá tamén a través dunha carta, un trato igualitario tanto para Carlos Arévalo e Rodrigo Germade, así como para Teresa Portela, “tres lendas do piragüismo nacional e internacional”.
O piragüismo galego é o deporte que máis investimento recibe da Xunta de Galicia cun total de 16 millóns de euros dende 2009, o que provocou que as licenzas se incrementaran nun 62% e nun 150% no caso das femininas, ata chegar ao total de 4.500.
Así, das 32 medallas olímpicas das que dispón Galicia, 16 (a metade) foron acadadas por padexeiros e padexeiras. A Xunta, dixo Lete Lasa, acadou estes resultados a través de “principios innegociables como os da máxima atención e coidado dos seus deportistas, así como da igualdade de oportunidades” que dixo, non estarse “cumprindo cos deportistas galegos no ámbito estatal aos que non se están aplicando criterios técnico deportivos”.
Teresa Portela renunciou en abril a acudir ao selectivo estatal de piragüismo
No caso de Teresa Portela, Lete Lasa lembrou como no pasado mes de abril, a española con maior número de participacións olímpicas, renunciou ao selectivo estatal e a oportunidade de volver formar parte do K4 500. Segundo recolle a información remitida pola Xunta “por un deixamento da Real Federación Española de Piragüismo (RFEP) no programa feminino, así como cambios nos criterios que a obrigarían a trasladarse a Sevilla tras o ciclo olímpico de París no que a embarcación se fraguou en Verducido”.
Neste sentido, Lete Lasa, apuntou á importancia de favorecer á conciliación das deportistas que deciden ser nais e compatibilizar as súas carreiras como é o caso de Teresa Portela dende 2014. “Non podemos permitir que o piragüismo nacional desaproveite á mellor piragüista en augas tranquilas da historia de España e a federación española debería desenvolver un proxecto gañador en torno á súa mellor baza”, advertiu.
A Xunta sostén que “apoia decididamente a conciliación con numerosos programas como o Plan Corresponsables e, sobre todo, dende a Oficina de Atención ao Deportista que tamén ofrece aos deportistas outras vantaxes como servizos de emprego ou sesións de asistencia psicolóxica”.
A situación de Rodrigo Germade
Lete Lasa apuntou á “vital importancia” da saúde mental dentro do deporte e amosou a súa desaprobación co trato recibido polo padexeiro Rodrigo Germade por parte da Real Federación Española de Piragüismo (RFEP) tras os Xogos Olímpicos de París, cando sufriu un cadro de ansiedade.
O secretario xeral para o Deporte reivindicou a figura de Germade como un dos padexeiros máis regulares dos últimos anos, con presenza en tres Xogos e con dúas medallas olímpicas e que é unha peza fundamental do K4 500. “Rodrigo e Carlos deben ser dúas fichas inamovibles desta embarcación como o levan sendo nos últimos anos demostrando que están por riba dos demais candidatos e sendo sinónimo de éxito”, asegurou.
Carlos Arévalo, fóra do Mundial de Milán no K1 200 e K4 500
Por último, Lete Lasa posicionouse sobre a situación que está a vivir Carlos Arévalo ao que a federación estatal de piragüismo non permite disputar as probas de K1 200 e K4 500 no Mundial de Milán pese a ter obtido a clasificación para as mesmas. O secretario xeral para o Deporte amosou a súa incomprensión de que se “frustren” desta maneira as posibilidades do único piragüista español que conseguiu proclamarse bicampión mundial na mesma cita, en Halifax 2022, precisamente nestas dúas especialidades.
“A xustificación da Real Federación Española de Piragüismo (RFEP) a través de criterios confusos e contraditorios non é suficiente ante un dos mellores piragüistas do momento que ten demostrado en ocasións similares que pode defender perfectamente acometer con éxito as dúas probas, independentemente do espazo que haxa entre elas, como xa fixo na Copa do Mundo de Szeged”, aseverou Lete Lasa.
Neste sentido, o mandatario galego reclamou á federación española que reconsidere a súa decisión e que permita competir ao padexeiro betanceiro Carlos Arévalo en ambas probas mundialistas por ser un dereito gañado polo padexeiro enriba da piragua en numerosas ocasións ao longo da tempada e porque “esta prohibición só prexudica ao piragüismo nacional e galego”.
