A Secretaría Xeral para o Deporte informa que mantén en marcha a serie de encontros virtuais que está a realizar con todo o tecido deportivo galego. Nesas xuntanzas telemáticas búscase “estudar as diferentes medidas a tomar para minimizar os prexuízos da declaración do estado de alarma por mor do coronavirus no eido deportivo”.
Segundo recolle na súa web este departamento da Xunta de Galicia, esta semana foi a quenda das federacións deportivas galegas de ciclismo na xornada do luns, balonmán na xornada do martes, baloncesto na xornada do mércores, voleibol na xornada do xoves e tríatlon onte. A todas elas, o secretario xeral para o Deporte, José Ramón Lete, avanzoulles que a Xunta de Galicia xa traballa nun “Plan de Continxencias, elaborado con expertos, para planificar o futuro da actividade física e o deporte en Galicia. Un estudo no que se concretará en detalle cando e como recuperar á normalidade deportiva e de competición”.
Nestas reunións, federacións e Xunta “analizaron o estado do convenio de colaboración asinado entre os dous entes para realizar na súa integridade a totalidade das actuacións, actividades, funcións e tarefas que, conforme á Lei 3/2012, do 2 de abril, do deporte de Galicia, asumen as federacións deportivas en réxime de exclusividade. Cómpre salientar que moitas federacións xa comezaron a percibir estas contías para evitar situacións de impagamento ou atrasos que poidan poñer en risco a súa viabilidade financeira”.
Opcións para resolver competicións suspendidas
Do mesmo xeito, estudáronse as posibilidades de resolver as competicións que quedaron suspendidas polo coronavirus ou o xeito de retomar a actividade deportiva con todas as garantías de seguridade.
A todos os responsables, o secretario xeral para o Deporte, José Ramón Lete Lasa, trasladoulles que “a actividade non poderá reiniciarse ata que existan garantías absolutas de seguridade e hixiene e non se poidan producir contaxios”. En todo caso recórdase a todas as federacións que a actividade 6/16 escolar e federativa non será retomada ata o vindeiro mes de setembro, sempre e cando o permita a situación.
Federación Galega de Ciclismo
No que respecta á actividade ciclista, o secretario xeral e o presidente da federación Juan Carlos Muñiz, analizaron as posibilidades de retomar a competición no último trimestre do ano polo que tamén se estudou como controlar ao público nas probas ao aire libre. A opción de ter que cancelar a tempada tamén foi valorada.
A Copa de España de Ciclismo en Estrada e a Volta a Galicia adiáronse ao mes de setembro, en función da evolución dos feitos.
Federación Galega de Balonmán
No caso de balonmán, o secretario xeral para o Deporte felicitou ao presidente Bruno López e a toda a directiva polo bo traballo realizado que permite que hoxe a federación transite por un escenario de estabilidade, así como polo traballo de teleformación impulsado desde a propia federación.
No que atinxe á competición no balonmán, valoráronse as opcións de resolver as ligas de Primeira Autonómica -a expensas do que faga a Real Federación Española de Balonmano, así como no caso das competicións nacionais-, Segunda Autonómica -varios escenarios- e as ligas inferiores nas que con toda seguridade se dea por finalizada a tempada sen ascensos nin descensos. Esta decisión tomarase nunha asemblea convocada pola federación.
Federación Galega de Baloncesto
Pola súa banda, o presidente da Federación Galega de Baloncesto, Francisco Martín, amosou a súa preocupación, que fixo extensible a todos os presidentes federativos, ante a resolución do Consejo Superior de Deportes que establece que as federacións deportivas son entidades vinculadas ou dependentes a unha Administración Pública e, en consecuencia, parte do sector público institucional.
En relación ás competicións autonómicas de baloncesto, a proposta para determinar a fin da competición será valorada pola Xunta Directiva e a Comisión Delegada o vindeiro luns.
Federación Galega de Voleibol
No caso de voleibol, o presidente da federación, José Ángel Luna, informou de que neste momento non se ten tomada ningunha decisión oficial sobre o reinicio ou fin das competicións, pero que se intentará retomar a tempada actual, na medida do posible.
Do mesmo xeito valórase a opción de realizar un torneo previo ao inicio da próxima tempada para establecer ascensos e descensos.
Federación Galega de Tríatlon e Péntatlon Moderno
No día de hoxe, a Secretaría Xeral reuniuse coa Federación Galega de Tríatlon e Péntatlon Moderno. O presidente, Gonzalo Triunfo, destacou a importancia da garantía do financiamento autonómico que entre o convenio e as licenzas suma o 70% dos seus ingresos.
Perante a volta á competición, estanse a valorar diversos escenarios pero resulta moi complicado retomar a actividade en breve.
A Xunta ten un mail para consultas deportivas sobre o COVID-19
O enderezo electrónico para as consultas estritamente deportivas como consecuencia da situación de COVID-19 segue funcionado a pleno rendemento para clubs e federacións (incidencias-federacions.deporte@xunta.gal).
Recórdase a todas as federacións que a actividade 6/16 escolar e federativa non será retomada ata o vindeiro mes de setembro se así o permiten as circunstancias
