O secretario xeral para o Deporte, Roberto García, acompañado pola delegada territorial en Vigo, Ana Ortiz, participou na presentación da Liga de Inverno de Cruceiros Cíes – Rande que comezará o vindeiro 31 de xaneiro co Real Club Náutico de Rodeira de Cangas como anfitrión.
O mandatario galego sinalou “a importancia de desestacionalizar un deporte como a vela que hoxe conta con numerosos eventos nos meses de outono e inverno, como esta liga que dinamiza unha clase tan importante como os cruceiros na ría de Vigo”.
Houbo liga de cruceiros en outono
Roberto García destacou o apoio do Goberno galego a este evento, que foi iniciativa da Xunta en 2024, que xa vai pola súa terceira edición e no que participan medio centenar de embarcacións. Neste sentido destacou aos vencedores da recentemente rematada Liga de Outono nas diferentes clases: ‘Salaño Dos’, ‘Magical’, ‘Unus’ e ‘ Esquío’.
O secretario xeral para o Deporte destacou o potencial da vela que é a cuarta disciplina que máis galegos ten levado a uns Xogos dende Rodrigo Andrade Olivé como suplente en Moscova 1980 ata Támara Echegoyen en París 2024.
Neste sentido lembrou as tres medallas olímpicas (o ouro do Tornado de Echavarri e Paz en Pequín 2008; o ouro do Eliiot 6m de Toro e Echegoyen en Londres 2012 e o bronce del 470 de Nico Rodríguez en Toquío 2020), así como os datos dunha federación que conta con preto de 2.500 licenzas e 70 deportistas de alto nivel.
