A Secretaría Xeral para o Deporte da Xunta de Galicia destina neste 2021 un total de 3,92 milllóns de euros a un programa de subvencións a clubs deportivos, sociedades anónimas deportivas e seccións deportivas, en réxime de concorrencia non competitiva. Segundo informa a administración autonómica, este importe duplica o do exercicio do 2020, coa principal novidade dunha parte destinada a medidas de seguridade e prevención pola COVID-19.
O Diario Oficial de Galicia publica no seu número de hoxe, xoves 18 de febreiro, a resolución da Secretaría Xeral para o Deporte pola que se establecen as bases reguladoras para a concesión en réxime de concorrencia non competitiva de subvencións, a clubs deportivos, sociedades anónimas deportivas e seccións deportivas de Galicia para o desenvolvemento de actividades deportivas e para a implementación de medidas de seguridade e prevención no desenvolvemento da actividade deportiva oficial como consecuencia da COVID-19, e se convocan para o ano 2021.
Do importe total, 1,92 millóns de euros serán distribuidos na liña de desenvolvemento das actividades deportivas e 2 millóns estarán reservados para os gastos derivados das consecuencias do coronavirus.
No caso das primeiras axudas, segundo informa o DOG do 17 de febreiro, a contía de axuda máxima para cada entidade non poderá superar os 10.000 euros.
No caso das segundas, esta contía baixa a 3.000 euros, se a organización participa en competicións oficiais non profesionais de ámbito estatal en modalidades de contacto, e a 1.500 euros para aquelas que compitan en campionatos non profesionais estatais en disciplinas sen contacto.
Aquelas que só compitan en ámbito autonómico optan tamén a un máximo de 1.500 euros. Ademais, neste suposto a entidade pode acceder ata un máximo de 4.500 euros se conta con equipos que formen parte dos dous supostos anteriores.
Prazo para pedir estas axudas á Xunta
O prazo para formalizar a solicitude para acceder a estas subvencións rematará o 18 de marzo (un mes desde o día seguinte á publicación do DOG) e esta deberá presentarse obrigatoriamente por medios electrónicos a través do formulario dispoñible na sede electrónica da Xunta na seguinte ligazón: https://sede.xunta.gal.
A Xunta mantén o importe das axudas para a adquisición de equipamentos deportivos
