O Diario Oficial de Galicia vén de publicar o pasado luns a orde do 8 de agosto de 2022, da Secretaría Xeral para o Deporte da Xunta de Galicia, pola que se establecen as bases reguladoras para a concesión de bolsas, en réxime de concorrencia competitiva, para persoas colaboradoras na residencia do Centro Galego de Tecnificación Deportiva (CGTD) para o curso 2022/2023, e pola que se procede a súa convocatoria.
En total convócanse seis prazas de colaboradores, precisando polo menos tres prazas ocupadas polo mesmo sexo (feminino ou masculino), co obxectivo de ter unha representación con paridade para poder garantir unha correcta atención ao colectivo de deportistas do centro, aínda que o número de prazas ofertadas poderá modificarse en función das necesidades derivadas da aplicación das medidas de protección estatais ou autonómicas para facer fronte á situación provocada pola pandemia, segundo informa Secretaría Xeral para o Deporte da Xunta de Galicia.
As persoas beneficiarias das bolsas completan a súa formación como estudantes á vez que se familiarizan con actividades relacionadas coas saídas profesionais dos estudos que están a cursar. Ademais, estas persoas disporán do aloxamento de domingo a venres e manutención completa – de luns a venres -, servizo de lavandaría, instalacións deportivas, servizo médico-deportivo e servizo de fisioterapia.
A concesión destas bolsas é compatible coa obtención de axudas ao estudo, agás aquelas que teñan como compoñente o pagamento de gastos de comedor e/ou residencia escolar, apuntan a información facilitada pola Secretaría Xeral para o Deporte da Xunta de Galicia.
As bolsas terán, como mínimo, unha duración dun curso escolar (de setembro a xuño) e poderán ser prorrogadas ata que a persoa beneficiaria remate os seus estudos sempre que cumpran cos requisitos e obrigas recollidas na convocatoria. O prazo de presentación das solicitudes será dun mes contado desde o día seguinte ao da publicación da convocatoria no Diario Oficial de Galicia. Se o último día de prazo fora inhábil, entenderase prorrogado ao primeiro día hábil seguinte.
