A Xunta de Galicia ven de comunicar a través do Diario Oficial de Galicia (DOG) que desde mañá, sábado 19, poderase realizar “actividade deportiva federada de competencia autonómica” seguindo os protocolos das diferentes federacións. Da así luz verde e abre ás portas á practicar deporte federado pero usando máscara para protexerse da COVID e mantendo, sempre que se poida, a distancia de seguridade.
No documento recóllese que as deportistas, de modalidades tanto individuais coma colectivas, deberán seguir o Protocolo Fisiocovid-DxTgalego e portar máscara se hai contacto físico. Igualmente se recomenda manter a distancia física e haberá que respectar as normas das instalacións nas que se practique o deporte en cuestión. Os protocolos federativos poderán ser máis restritivos.
Con todo, como ven sendo habitual, advírtese que as medidas preventivas previstas “deben ser obxecto de seguimento e avaliación continua co fin de garantir a súa adecuación á evolución da situación epidemiolóxica e sanitaria”.
O deporte galego leva tempo preparándose para responder ante a COVID-19
Tal e como apunta o Goberno galego nesta publicación no DOG, “o deporte galego leva preparándose no seu conxunto varios meses para responder como sistema intelixente e facer fronte coas debidas garantías aos riscos derivados da crise causada polo COVID-19”.
Recórdase no Diario Oficial de Galicia, que a través da Resolución do 15 de xuño de 2020, da Secretaría Xeral para o Deporte, “aprobouse o Protocolo Fisicovid-DxTgalego polo que se establecen as medidas para facer fronte á crise sanitaria ocasionada polo COVID-19 no ámbito do deporte federado de Galicia. Conforme o disposto na dita resolución o protocolo aprobado por ela debe ser tido en conta polas federacións deportivas galegas ao elaboraren os seus respectivos protocolos”.
A notificación da Consellería de Sanidade publicada hoxe no DOG e asinado polo conselleiro de Sanidade, Julio García Comesaña, recolle a “modificación de determinadas medidas previstas no Acordo do Consello da Xunta de Galicia, do 12 de xuño de 2020, sobre medidas de prevención necesarias para facer fronte á crise sanitaria ocasionada polo COVID-19, unha vez superada a fase III do Plan para a transición cara a unha nova normalidade”.
Protocolo Fisicovid-DxTgalego
As conclusións son que a práctica da actividade deportiva federada de competencia autonómica “poderá realizarse de forma individual ou colectiva, de conformidade cos protocolos de que deben dispoñer as federacións deportivas galegas, segundo o modelo do Protocolo Fisicovid-DxTgalego polo que se establecen as medidas para facer fronte á crise sanitaria ocasionada polo COVID-19 no ámbito do deporte federado de Galicia, aprobado pola Resolución da Secretaría Xeral para o Deporte do 15 de xuño de 2020, os cales deberán ser aprobados mediante resolución da Secretaría Xeral para o Deporte”.
Explícase tamén que nestes protocolos “recolleranse as condicións para a realización de adestramentos e para a celebración de competicións, deberán identificarse as situacións potenciais de contaxio, atendendo ás vías recoñecidas polas autoridades sanitarias, e establecerse as medidas de tratamento de risco de contaxio adaptadas á casuística”.
DOG: “A práctica da actividade deportiva federada de competencia autonómica “poderá realizarse de forma individual ou colectiva, de conformidade cos protocolos de que deben dispoñer as federacións deportivas galegas, segundo o modelo do Protocolo Fisicovid-DxTgalego polo que se establecen as medidas para facer fronte á crise sanitaria ocasionada polo COVID-19 no ámbito do deporte federado de Galicia”
Advirte a Xunta de Galicia que o protocolo “será de obrigada observancia para o conxunto dos estamentos federativos e deberá publicarse na páxina web da federación deportiva”.
Tamén se avisa de que no caso de realizarse a actividade en instalacións deportivas, “a práctica axustarase ademais aos termos establecidos para estas”.
Distancia e máscara
As normas básicas para evitar o contaxio da COVID-19 son o lavado de mans, a distancia interpersoal e o uso de máscara. Todo iso mantense no deporte galego. Así no DOG indícase expresamente:
- “Sempre que sexa posible, durante a práctica da actividade deportiva federada de competencia autonómica deberá manterse a distancia de seguridade interpersoal”.
- “Na realización de adestramentos e na celebración de competicións dentro da actividade deportiva federada de competencia autonómica, aplicarase, respecto ao uso da máscara, o recollido especificamente no protocolo das federacións deportivas respectivas aprobado pola Secretaría Xeral para o Deporte”.
- “En todo caso, no dito protocolo deberá preverse que cando a actividade deportiva supoña contacto físico entre as persoas que a practican deberá utilizarse a máscara, salvo que no protocolo respectivo se inclúan medidas alternativas de protección específicas”.
Cabe lembrar que a Secretaría Xeral para o Deporte da Xunta de Galicia leva tempo traballando coas federacións para buscar as mellores solucións para manter a práctica deportiva con mecanismos de prevención diante do posible contaxio da COVID-19.
No propio DOG explícase: “a través de grupos de traballo coas 58 federacións deportivas galegas, constituídos segundo similitudes da práctica deportiva para favorecer a súa complementación á hora de identificar potenciais situacións de risco de contaxio e determinar as medidas máis eficaces e eficientes de acordo cos contextos concretos en que se desenvolve a práctica deportiva en cada caso, desenvolvéronse os protocolos propios para cada unha delas co obxecto de adoptar as medidas necesarias para evitar a xeración de riscos de propagación da enfermidade COVID-19, así como a propia exposición a eses riscos, para que a práctica do deporte segundo o establecido nos protocolos de referencia sexa unha práctica segura”.
Xa había deportistas con permiso da Xunta para ter contacto no deporte
Non hai nin un mes que a Xunta de Galicia permitía o deporte con contacto no caso dalgúns deportistas. Principalmente deportistas de alto nivel, deporte adaptado e as deportistas non profesionais que competían no ámbito estatal, para evitarlles perxuizos competitivos.
En concreto desde o venres 28 de agosto, a permítese o contacto físico na práctica da actividade deportiva federada para:
- As mellores deportistas de Galicia: deportistas galegos de alto nivel e deportistas de alto nivel recoñecidas polo Consello Superior de Deportes clasificados para Tokio 2020 ou que se encontren en proceso de clasificación.
- As deportistas con maiores necesidades: deportistas de especialidades deportivas adaptadas individuais con guías ou persoas de apoio.
- Os equipos que poidan padecer prexuízos pola situación noutras comunidades. Os equipos galegos que participen en competicións deportivas oficiais non profesionais de ámbito estatal con previsión de inicio da competición, salvo que o protocolo da federación española respectiva estableza outra cousa.
