O xornalismo e os medios de comunicación poden e deben comprometerse co deporte feminino e informar del cunha perspectiva de xénero. Esta foi unha das principais reflexións da xornada ‘A linguaxe e o deporte de mulleres‘ , organizada po Concello da Coruña, a través da Concellería de Deportes e o grupo ‘Deporte e Muller’, no Museo Estrella Galicia.
O acto, presentado por Silvia Carregal, directora de As Nosas, comezou cunha intervención da concelleira Mónica Martínez, quen recalcou a necesidade de mudar o uso da linguaxe e as formas de contar, narrar e falar do deporte practicado por mulleres.
A continuación, tivo lugar unha ponencia a cargo de Claudia López López, doutoranda en Ciencias do Deporte na Universidade da Coruña. Nela, López puxo o foco na linguaxe sexista na comunicación deportiva.
A doutoranda destacou a responsabilidade dos medios de comunicación cara a sociedade, á hora de traballar cara un xornalismo feminista, que visibilice ás mulleres sen caer en estereotipos, infravaloralas ou infantilizalas, e sendo un espazo para que nenas e mulleres poidan contar con referentes.
Finalmente, o evento contou cunha mesa redonda moderada por Silvia Carregal e composta por María Varela, de La Opinión, Paulo Alonso, de La Voz de Galicia, Zeltia Regueiro, do DXT Campeón e Fran Hermida, da Radio Coruña Cadena SER.
Na charla, as e os profesionais coincidiron en que é necesario exercer a autocrítica para deixar de lado a linguaxe sexista, e traballar para loitar contra aquelas voces machistas que seguen deixando ás mulleres e ao deporte feminino nun segundo lugar.
Como facer un xornalismo deportivo con perspectiva de xénero?
Entre algunhas das conclusións ás que se chegaron na xornada, estivo a autorevisión que deben facer os e as xornalistas á hora de exercer.
É necesario aumentar a presencia das deportistas nos medios de comunicación, e utilizar un tratamento simétrico entre mulleres e homes, seguindo os mesmos criterios informativos para ambos.
Segue resultando imprescindible informar con perspectiva de xénero, botando a un lado a vida persoal das e dos deportistas, pero sen deixar de informar das dificultades polas que pasan as mulleres deportistas visibilizando os obstáculos que superan.
Non basta con non sexualizar nin consificar ás deportistas, senón que tamén é importante recoñecer o seu valor propio, fuxindo de comparativas cos homes. Unha ferramenta axeitada é a regra da inversión, que serve para detectar o sexismo mudando as referencias sexuadas no xornalismo.
Fóra das pistas, é necesario aumentar a presenza de expertas deportivas no xornalismo, para incluir máis voces femininas nas conversacións deportivas, e ter sempre en conta a diversidade de identidades, evitando o masculino xenérico e alternando o feminino e o masculino cando sexa necesario.
Así mesmo, por parte de federacións e clubs, aínda existen casos nos que a información das categorías femininas é notablemente escasa, dificultando o acceso aos datos necesarios para informar delas.
Malia que o xornalismo acolle cada vez con máis igualdade o deporte feminino, queda camiño por percorrer ata chegar a un tratamento igualitario.
