O Comité Galego de Adestradores da Real Federación Galega de Fútbol que preside Iván Cancela, organiza o vindeiro luns 3 de febreiro en Vimianzo unha xornada formativa na que participarán Albert Gil, director do fútbol base do RC Deportivo, e Fernando Vázquez, adestrador do primeiro equipo do club herculino. Ao evento tamén asistirá o presidente da entidade coruñesa Fernando Vidal.
O encargado de abrir a xornada será Albert Gil. “Da ilusión á profesión” é un relatorio co que pretende narrar a súa experiencia no mundo do deporte rei centrado nas categorías inferiores.
Logo chegará a quenda de Fernando Vázquez, un dos adestradores máis queridos no mundo do fútbol.O mago de Castrofeito dirixiu a nove equipos diferentes entre Primeira e Segunda División a final da década dos 90 nun período de moitos cambios para Vázquez.
Bancos como o do Compostela, Oviedo, Mallorca, Betis, As Palmas, Rayo Vallecano, Valladolid e Celta forxaron a personalidade dun gran técnico que viviu grandes momentos como as permanencias co Compos, e decepcións como o descenso das Palmas a Segunda. Tras a súa destitución no Celta en 2007, Vázquez apartouse dos focos.
Pasaron os anos e parecía que nunca máis volveríamos a ver ao mago correr a banda para celebrar cada un dos goles do seu equipo. Con todo regresou, e fíxoo ao grande. En 2013 Lendoiro recorreu ao de Castrofeito para levantar a un equipo afundido na clasificación.
Consciente de que o equipo necesitaba axuda, o primeiro que fixo o técnico galego foi facer un chamamento á afección, convencelos de que se podía lograr o milagre. E Riazor respondeu. Unidos baixo a figura de Fernando Vázquez xogadores e afección loitaron xuntos para reflotar a un Dépor. E case o logran. Unha inoportuna derrota ante a Real Sociedade terminou co equipo na categoría de prata do fútbol español. Un ano despois o fútbol foi xusto con Fernando e o equipo logrou ascender a Primeira cun persoal na que estaban numerosos canteiráns.
Fernando Vázquez está agora de volta e, unha vez máis, volveu ocorrer. O de Castrofeito aceptou o reto que lle propuxo Fernando Vidal e a historia parece estar a se reescribir. Unha vez máis o deportivismo e o equipo uníronse ao redor da figura do míster galego.
Inscricións para a xornada
Todos os interesados/ as en asistir a esta xornada que terá lugar na Casa da Cultura de Vimianzo o luns 3 de febreiro a partir das 20 horas deberán formalizar a súa inscrición a través da seguinte ligazón: INSCRICIÓN no que o único requisito é ser maior de 16 anos.
