Disputouse a Xornada Norte da Liga de Deporte Base de Loitas Olímpicas no pavillón do Colegio Diocesano San Lorenzo de Lugo. Foi este sábado 25 de marzo.
A cita, segundo informa a Federación Galega de Loita (FEGALOITA), foi un éxito no que atinxe ao número de deportistas e clubs participantes. Houbo máis de 200 deportistas nesta cita de Lugo, para disputar esta xornada lúdico – deportiva de deporte base.
A competición levouse a cabo sobre catro tapices oficiais de loita e adaptados aos máis pequeños.
O mellor indicador do deporte base na modalidade de loitas olímpicas, é o aumento de deportistas e, nomeadamente, o incremento de deportistas femininas que se sumaron a esta competición.
Segundo informa a Federación Galega de Loita (FEGALOITA), “as mulleres estanse a converter no selo distintivo das loitas olímpicas. Máis da metade das persoas participantes nesta xornada era de categoría feminina”
A clasificación final por clubs foi a seguinte:
- Club de Loitas Olímpicas de Vilalba: 174 pts.
- Escuela Ayude de Santiso: 127 pts.
- Club Keltoi de Vila de Cruces 125 pts.
- Federación Asturiana de Lucha 114 pts.
- Club de Loita Lugo 93 pts.
- Club Atila de Ourense 92 pts.
- Club Graiño de A Coruña 52 pts.
Logo desta xornada norte, o vindeiro sábado 1 de abril, terá lugar aa xornada sur que se fará no CGTD de Pontevedra.
