A Federación Galega de Balonmán, a través do programa Xoga balonmán na escola, entrará en máis de 120 centros escolares da provincia de Pontevedra. O obxectivo fundamental desta actuación é dar a coñecer o balonmán a máis de 3.500 alumnos/as de cuarto de Primaria.
O programa Xoga balonmán na escola, realizado en colaboración coa Secretaría Xeral para o Deporte, comezará a desenvolverase ao longo de algo máis dun mes. A Federación Galega de Balonmán realizará unha unidade didáctica, formada por cinco sesións, que se impartirá en horario lectivo e que permitirá aos alumnos/as achegarse ao noso deporte dunha forma lúdica e divertida. A última sesión consistirá nunha competición entre os centros, que seguro que fará as delicias dos rapaces e rapazas.
Para levar adiante este ambicioso proxecto denominado Xoga balonmán na escola, a Federación Galega de Balonmán contará coa colaboración de 20 clubs, que aportarán monitores para chegar a todos estes centros escolares de Vigo, Val Miñor, Paradanta, Morrazo, Salnés, A Estrada e Pontevedra. Nos días previos ao comezo da actividade, os monitores e monitoras están a realizar unha formación para levar a mesma unidade didáctica a todos os centros. Trátase das seguintes vinte entidades deportivas:
- Balonmán Arousa
- Bueu Atlético
- Balonmán Cañiza
- AD Carballal,
- Chapela
- As Choqueiras de Redondela
- Cisne
- Atlético Guardés
- UB Lavadores
- Luceros
- Asmubal Meaño
- Moaña
- Atlético Novás
- BM Porriño
- Rasoeiro
- Samertolameu
- BM Sanxenxo
- Seis do Nadal
- Teucro
- BM Tui
Xoga balonmán na Escola xa está en macha na Costa da Morte
O presidente en funcións da Federación Galega de Balonmán, Bruno López, agradeceu a posibilidade brindada pola Secretaría Xeral para o Deporte, a través do xefe provincial de Deportes de Pontevedra, Daniel Benavides. “É para nós unha gran oportunidade para achegar o balonmán a todos estes pequenos, e que poidan descubrir os seus valores, porque o balonmán é un deporte que, cando o coñeces, engancha”, manifestou.
Xoga balonmán na escola é unha actuación máis das que está a realizar a Federación Galega de Balonmán para promocionar esta modalidade deportiva entre as e os máis cativas/os, algo que tamén se está facendo actualmente na Costa da Morte.
