Esta fin de semana, o Club Viravolta ten dobre cita. O sábado 20, as irmás rusas Arina e Dina Averina, dúas das mellores ximnastas do panorama internacional, darán unha masterclass no colexio Peleteiro. O domingo 21, celebrarase en Santiago de Compostela un campionato-gala, no que estará presente Natalia García Timofeeva, referente na ximnasia rítmica española.
Ademais, o evento da Gala Viravolta-Jael estará amadriñado por Carolina Rodríguez, ximnasta olímpica. A cita terá lugar desde as 10:00 horas no Multiusos Fontes do Sar.
As irmás Averina en Santiago
Na xornada do sábado, as ximnastas rusas, líderes na ximnasia rítmica mundial, impartirán unha sesión de mañá para as nenas e nenos de nivel autonómico e outra na tarde para as deportistas de nivel nacional.
A convocatoria foi todo un éxito, xa que todas as prazas se esgotaron o mesmo día da súa saída, segundo informan desde o Viravolta. A iniciativa está organizada en colaboración coa Xunta de Galicia, o Xacobeo 21-22 e o Concello de Santiago.
Ver esta publicación en Instagram
Carolina Rodríguez e Natalia García, na gala do Viravolta
Ao día seguinte, celebrarase a Gala Viravolta-Jael co VII Torneo Viravolta-Jael no Multiusos do Sar coas ximnastas Carolina Rodríguez como madriña e Natalia García como convidada. Esta última ximnasta anunciou a súa retirada recentemente, o que fai aínda máis especial a súa presenza en Santiago de Compostela.
Na competición citaranse máis de 12 clubs de todos os puntos de España, sumando a preto dun cententar de ximnastas. Así mesmo, o torneo serve como preparación ao campionato de España de ximnasia rítmica que terá lugar en Valladolid a vindeira semana.
Ademais, a Gala Viravolta-Jael será benéfica. Todo o importe recaudado nas entradas irá donado íntegramente á Fundación ASANOG, en axuda a nenas e nenos oncolóxicos de Galicia.
Entre os nomes destacados da gala, ademais das irmás ximnastas Averina, tamén estarán presentes as rusas Ekaterina Selezneva e Aleksandra Soldatova, as internacionais españolas Paula Serrano, Sol Martínez e Cristina Korniychuk, a adestradora Ruth Fernández, Candela Martínez, bronce estatal, e a súa nai, Marta Bobo, olímpica en Los Ángeles 1984.
