A xove Xela Martínez segue imparable. A atleta da Atlética Lucense xa lograra na pasada semana o título estatal no Campionato de España de Pista Cuberta sub18, onde se impuxo acadando o récord da proba nos 1500 metros.
Agora, a deportista de 16 anos suma un novo campionato, o de campo a través sub18, no que foi a auténtica dominadora da proba. Xela proclamábase campioa de España en Xetafe, cunha marca de 22.26 minutos, a case medio minuto da segunda clasificada, María Viciosa, de Castela e León.
No resto de actuacións, segundo informa a Federación Galega de Atletismo, a Selección Sub16 feminina lograba a décima posición no que a mellor atleta foi Amparo Corredoira que entraba no posto trixésimo primeiro.
A segunda medalla para o grupo galego chegaba na categoría masculina, da man de Teo de Frutos que lograba a terceira posición Sub16. A Selección Sub16 masculina logrou un extraordinario subcampionato nacional a tan só un punto do título. Por último, sexta posición para a Selección Sub18 masculina con Sergio Quintas como mellor galego na sétima posición.
