O atletismo galego sorrí. Nas filas da Atlética Lucense loce, talvez, a fondista con maior futuro das últimas décadas. Xela Martínez, de 16 anos, foi elixida este sábado “Mellor atleta feminina Xeración Atletismo” na gala de premios anuais da Real Federación Española de Atletismo.
O galardón coincidiu, ademais, coa consecución do bronce por equipos no Campionato do Mundo escolar de campo a través, cunha actuación estelar da corredora lucense. Tan só Uganda e Marrocos superaron ao combinado español, aínda que non impediron á selección nacional consolidarse como a primeira potencia europea de cros escolar.
Xela Martínez, acompañada de Mariam Benkert, Sara Bogo, Claudia Rendueles e María Viciosa, levantou a España á terceira posición mundial desta categoría.
A súa imaxe, aparentemente fráxil e doce, xa non pode enganar a ninguén. Na pista todos saben do que é capaz esta atleta, que bateu recentemente os récords de España de 1.000 e 3.000 metros en categoría Sub-18 e Sub-16, e que cos seus logros xa se converteu hai tempo na gran promesa do atletismo galego.
A perla lucense pulverizou as marcas de corredoras moito maiores que ela e todos se preguntan onde estará o seu teito. Xela Martínez ten unha desas calidades que a fan diferente; o seu sorriso. Ao longo da historia moitos foron os deportistas que esbozaron ese aceno gañador. Ese xesto facial que pese ao esforzo físico realizado continúa indemne. É o sorriso de quen goza correndo, pero sobre todo de quen alcanza o seu obxectivo.
Os expertos encomian a súa forma de correr. Unha figura demasiada esvelta e lixeira como para tocar o firme. Case voa sobre a pista. Ademais, Xela Martínez é unha atleta versátil capaz de adaptarse a diferentes distancias e superficies e a despregar unha velocidade envexable nos tramos finais das carreiras, o que ilusiona aínda máis aos expertos do mundo do atletismo.
Xela Martínez, onde está o teito?
Para facerse unha idea do potencial desta moza só hai que fixarse na marca que logrou este mesmo mes de abril na Pista Municipal de Faro (Portugal). Xela Martínez correu os 5.000 metros en 16,45 min. Pero mesmo máis rechamante é a marca que bateu en xaneiro, en Ourense. Nesa ocasión logrou correr os 1.500 metros nun tempo de 4,23 min. Nos últimos Xogos Olímpicos a atleta kenyana Faith C. Kipyegon fíxose co ouro nesta mesma distancia cunha marca de 3,53 minutos. A kenyana ten 28 anos, Xela Martínez so 16.
É imposible a estas alturas prognosticar o éxito dunha deportista tan nova, pero xa ninguén lle pode arrebatar a esta corredora da Escola Atlética Lucense a ilusión xerada no atletismo galego e nacional, que seguirá moi de preto os seus progresos.
