A Xunta de Galicia segue a elaborar as Guías DXT Galego ‘Volvendo con sentidiño e esta semana publica a quinta edición. Nela, a Secretaría Xeral para o Deporte e expertos universitarios coordinados por Rafael Martín Acero, catedrático da Universidade da Coruña, a publicación explora a ‘Flexi-organización de competicións e calendarios en tempos de COVID-19: sistema iterativo de competición modular (SíCoM-DXT Galego)’.
Esta quinta Guía do DXT Galego afronta o sistema iterativo de competición modular, o cal permite que cada federación flexi-organice a repetición de módulos de competición e ordear e pautar o calendario das competicións. Desta forma, os paróns non impedirían continuar, eliminarían a necesidade de “volver atrás”, e todo isto garantindo os dereitos deportivos das deportistas.
Con esta edición, Rafael Martín Acero, Dan Río Rodríguez, Joaquín Gómez Varela e Javier Rico Díaz, da Secretaría Xeral para o Deporte e a Universidade de Santiago de Compostela, finalizan e completan a serie de guías do DXT Galego. Así, configúrase un documento único que, segundo a administración galega, contribuirá a reactivar os adestramentos e competicións das arredor de 300 especialidades deportivas que se practican en Galicia e a recuperar o músculo do deporte galego, así como a plenitude física e psíquica de federacións, clubs e deportistas.
As anteriores edicións da Guía DXT Galego
A primeira Guía destas características publicouse o pasado 29 de xuño, centrándose nas ‘Recomendacións para a aceleración da reactivación e readaptación técnico/táctica do deportista en busca da súa motivación progresiva par as esixencias da competición’.
A segunda delas, publicada o 3 de xullo, versaba sobre as ‘Recomendacións para a aceleración da reactivación e readaptación técnico/táctica do deportista para a súa motivación e achegamento progresivo ás esixencias do partido”.
A terceira delas, do 8 de xullo, tratou a ‘Aceleración da reactivación e readaptación técnico/táctica do deportista para motivalo e achegalo progresivamente ás demandas da loita, combate, etc”; mentres que a cuarta foi sobre ‘Achegarse do modo máis seguro posible á volta á competición de nenos, mozos e amateurs’, e foi publicada o 5 de xaneiro.
Podes consultar nesta ligazón, o listado completo de Guías DXT e aquí a súa quinta edición:
Un documento en apoio do deporte galego
As Guías DXT Galego ‘Volvendo con sentidiño’ elabóranse para federacións, clubs, profesores e adestradores, para aportar suxestións científicas coa intención de acelerar a volta á normalidade deportiva, seguindo as normativas sanitarias e garantindo a seguridade.
Lete Lasa: “A Xunta de Galicia entende que neste momento, garantir a seguridade e a saúde da nosa poboación tamén pasa por recuperar a actividade deportiva”
En palabras do secretario xeral para o Deporte, José Ramón Lete Lasa, este docuemento é un exemplo do traballo da Xunta na busca do “constante apoio e consenso en todos e cada un dos membros desta sólida sociedade da que somos responsables”. Unha vez rematado o periodo de corentena, vivido no 2020, “a Xunta de Galicia entende que neste momento, garantir a seguridade e a saúde da nosa poboación tamén pasa por recuperar a actividade deportiva”, declara o secretario.
Pílulas solidarias, un proxecto internacional
Ademais da elaboración destas Guías DXT Galego, a Xunta participa coa Sociedade Iberoamericana de Psicoloxía do Deporte (SIPD) na edición dun libro baixo o título ‘Pílulas solidarias‘.
Nel recóllense iniciativas de adestramento mental, realizadas durante os meses de confinamento para axudar á preparación e motivación das deportistas, técnicas e representantes do deporte. En total, participaron ata vinte países.
GUÍAS DXT GALEGO
Recomendacións para a aceleración da reactivación e readaptación técnico/táctica do deportista en busca da súa motivación progresiva para as esixencias da competición’
‘Recomendacións para a aceleración da reactivación e readaptación técnico/táctica do deportista para a súa motivación e achegamento progresivo ás esixencias do partido’
‘Aceleración da reactivación e readaptación técnico/táctica do deportista para motivalo e achegalo progresivamente ás demandas da loita, combate, etc.’
‘Achegarse do modo máis seguro posible á volta á competición de nenos, mozos e amateurs’.
DESCARGA A FERRAMENTA ADESTRAR
