- O Club Waterpolo Pontevedra proclamouse campión da Liga Galega Absoluta Feminina de División de Honra nesta tempada 2022 ao gañar os partidos de ida (9-11) e volta (16-11) ao RCN Vigo.
O pasado domingo 29 de maio disputouse na piscina Rosario Dueñas de Ourense o partido de volta da final do play-off polo título de liga autonómico en categoría absoluta feminina. O partido de ida, xogado un mes atrás (24 de abril) finalizou cun axustado 9-11 tras perder unha vantaxe de 7 goles que levaba o CW Pontevedra no terceiro cuarto. Con todo por decidir no partido de volta, o CW Pontevedra saíu a por a vitoria, sen pensar nos goles de vantaxe que traía da piscina do RCN Vigo.
As locais comezaron dominando o partido desde os primeiros minutos, aínda que sen ser capaces de distanciarse no marcador, chegando a poñerse por diante o RCN Vigo en varias ocasións do terceiro cuarto. Sen poñerse nerviosas, as xogadoras do Club Waterpolo Pontevedra demostraron a súa experiencia e volveron dar a volta ao partido, cun bo último cuarto no que lograron sentenciar o partido e a final, para gañar 16-11.
Pleno de éxitos do Club Waterpolo Pontevedra
Desde o club pontevedres cualifican de “espectacular” a tempada realizada por este equipo de xogadoras de Ourense e Pontevedra, que se fixeron co último título da tempada: a liga Galega Absoluta Feminina de División de Honra. Este bloque faise así co pleno de títulos autonómicos da tempada 2021-22 (Copa Galega Absoluta Feminina, Copa Galega Xuvenil Feminina e agora Liga Galega Absoluta Feminina).
Este ronsel de títulos pon un broche de ouro á unha tempada histórica tempada na que tamén conseguiron o ascenso a Primeira Nacional Feminina. Tal e como apuntan desde o CW Pontevedra “o esforzo que durante estes meses fixeron as mozas tanto de Ourense como de Pontevedra para adestrar xuntas deu os seus froitos e pagou a pena”.
FICHA TÉCNICA
16) CW PONTEVEDRA: Patri, Uxía, María D, Ángela, Iria A (1), Andrea F (2), Iria G, Izaskun (2), Rocío (2), Sabela, Irene (2), Andrea A (7) e Ali.
11) RCN VIGO: Fernández, Pereira (2), Fernández, Villar (1), Aguiño, Sousa, González (2), Carrera (6), Dupuy e Taboas.
PARCIAIS: 4-2, 3-4, 5-4, 4-1
INCIDENCIAS: Logo do partido o presidente da FEGAN fixo entrega do trofeo de campioas ao equipo pontevedrés.
O CW Pontevedra fai historia e ascende a Primeira Nacional Feminina
