O Club Waterpolo Pontevedra abre as súas portas un ano máis a todos e todas aqueles/as nenos e nenas desde 8 a 13 anos (mozas sen límite de idade) que queiran probar o waterpolo. Iso si, cumprindo todas as medidas de seguridade e control con motivo do COVID-19.
Detallan dede o club que debido á “situación de cambio constante, os horarios, días e instalacións de adestramento poderán ir variando, polo que desde o club pontevedrés piden a aquelas persoas interesadas en probar o waterpolo, que se poñan en contacto a través do correo electrónico (info@waterpolopontevedra.com), do novo teléfono de contacto (604002018) ou de calquera das súas redes sociais (páxina web, facebook, instagram ou twitter). Unha vez solicitada a información, desde o club informarán de que días/horarios poderán acudir á piscina e liquidar calquera dúbida”.
Tras o parón obrigado pola pandemia da COVID-19, o Club Waterpolo Pontevedra volveu aos adestramentos o pasado mes de xullo, “cumprindo uns estritos protocolos de seguridade e adestrando sen contacto, cos obxectivos de traballar os aspectos de condición física, técnica e táctica (sempre con distancia de seguridade), e sobre todo de forma lúdica e en equipo”, explican.
Na entidade sosteñen que teñen comprobado que “se pode facer deporte de forma segura, e con todos os beneficios que leva”, polo que o club pontevedrés considera que xa pode “abrir as portas a novas incorporacións”.
Desde club animan a probar “un dos deportes máis completos e divertidos”, nun club onde presumen de que a súa filosofía é que “non só formamos deportistas, sobre todo formamos persoas”. Engade que ademais “sempre coa saúde por diante de todo, queremos que os/as novos sigan practicando deporte como forma de vida”.