O Servizo de Deportes do Concello da Coruña anunciou esta mañá, venres 4 de decembro de 2020, que os cursos de natación das Escolas Deportivas Municipais en San Diego e Santo Amaro se retomarán o vindeiro mércores, 9 de decembro, de acordo co establecido na Orde da Consellería de Sanidade do 3 de decembro de 2020.
Os cursos suspendéranse a finais de novembro naquel momento o Concello da Coruña explicaba que “debido ás consultas realizadas á Consellería de Sanidade, estábase organizando os devanditos cursos de forma individual e seguindo un estrito protocolo fronte á COVID-19. Con todo, e ante este escrito da administración autonómica, a Concellería de Deportes vese na obriga de suspender os cursos até que a Sanidade se pronuncie sobre as novas restricións na cidade a partir do vindeiro 4 de decembro”. Mantivose a práctica da natación de xeito individual nestas piscinas, así como o deporte colectivo federado.
Na natación mantéñense os protocolos previos á suspensión
Agora, o Servizo de Deportes reinicia as clases con grupos de seis persoas máis monitor/a. Iso é, mantéñense os mesmos protocolos e condicións que estaban vixentes no momento que tiveron que se suspender as clases debido ás restricións sanitarias impostas polo SERGAS, por mor da evolución na cidade da pandemia de COVID-19.
Desde o Servizo Municipal de Deportes da Coruña explican que como o luns 7 de decembro é día non lectivo, de acordo co calendario escolar, as escolas de natación comezarán o día 9 de decembro.
Canto ao uso das piscinas, deberase respectar a capacidade establecida na orde, cun máximo do 50% da dita capacidade.
