A primeira popular de atletismo en ruta post confinamento xa ten data. A Sociedad Gimnástica de Pontevedra converterase no primeiro club de Galicia en organizar unha proba popular de atletismo en ruta. A nova normalidade exténdese así a máis aspectos da vida deportiva galega. Será o XXXVIII Gran Fondo XXV Medio Maratón de Pontevedra.
O 18 de outubro, a cidade de Pontevedra será pioneira do atletismo en ruta post confinamento. Ás 9:00 horas da mañá darase o pistoletazo de saída aos primeiros corredores do Medio Maratón de Pontevedra, evento organizado conxuntamente pola Sociedad Gimnástica de Pontevedra e o Concello da cidade do Teucro.
Xa constan na lista de participantes inscritas corredoras de clubs como La Mochila del Deporte, Miller Running Club, Ponte a Correr, ADA Calviá, CA La Blanca, Bikila, Samertolameu, Triatlón Rías Baixas, Trinorth e Fluvial de Lugo.
O día da proba, as inscricións realizaranse en dúas quendas. A primeira, desde as 7 da mañá do 5 de outubro até as 23:59h do día 6. Nesta franxa poderanse inscribir os empadroados/as no Concello de Pontevedra ou os/as atletas federados en clubs do municipio pontevedrés. Desde as 15:00h do 8 até as 23:59h do 11 de outubro desenvolverase o segundo prazo no que se poderán inscribir os corredores/as restantes, independentemente do empadroamento.
Recorrido novo para a popular e saída con 20″ entre atletas
Segundo explican desde a entidade organizadora “o evento innovará no circuíto cun novo percorrido máis chairo, pero sen a beleza de atravesar a zona vella de Pontevedra”. Relatan desde a Sociedad Gimnástica de Pontevedra, “o obxectivo é principalmente cumprir os controis sanitarios e que os xuíces poidan ter máis visibilidade para controlar aos corredores”.
Destacan desde o club pontevedrés que o máis rechamante “é a saída, na que se busca que haxa distancia social entre todos os participantes. Sairán de dous en dous corredores cun intervalo de vinte segundos e irán acompañados da máscara até o pistoletazo de saída”. Esta medida forma parte do protocolo de prevención da COVID-19 dentro da proba atlética.
