Logo dun ano en branco, por mor da pandemia de COVID-19, o CBS Cambre volveu á competición na máxima categoría feminina estatal, a SSL Spanish Softball League.
Mañá, domingo 4 de abril, disputará o seu primeiro partido como local deste curso 2021. Será no terreo de xogo de Acea de Ama de Culleredo en xornada dobre. O primeiro cruce, dará inicio a partir das 10:00 horas. Mentres que o segundo, será a continuación do primeiro. O rival é o Dridma de Rivas C.d. Deporte
Desde o Club Béisbol Sóftbol Cambre advirten que agardan que sexa unha “xornada complicada contra un gran equipo que o ano pasado quedou no terceiro lugar da competición”.
Con todo, avisan de que “as xogadoras seguro que darán o mellor delas para superar o segundo reto da tempada”.
O equipo de Cambre perdeu os dous primeiros partidos
Na primeira xornada as galegas caeron derrotadas nos dous partidos cuns tanteos de 8-0 e 7-0 ante o Sant Boi, un dos cocos da categoría.
Froito desas derrotas na primeira xornada o conxunto galego ocupa neste momento o posto de colista, algo que pouco quere dicir cunha única xornada disputada na competición desta SSL Spanish Softball League 2021.
