Despois do descanso de Nadal, a Liga Guerreras Iberdrola volve a coller ritmo. Co inicio da segunda volta, o Conservas Orbe Rubensa BM Porriño recibirá ao Liberbank Gijón, na oitava xornada competitiva. O duelo será o sábado, 16 de xaneiro, ás 16:00 horas.
Para poder sumar os dous puntos, desta vez o Porriño deberá ser superior en efectividad en acciones de ataque, e impoñerse ao seu rival. Non foi así no partido de ida, cando as galegas perderon por 30-24 ante as asturianas.
Naquel encontro, Mónica Soares foi a xogadora máis destacada nas filas do Porriño. Con sete goles, foi a máxima anotadora do duelo por parte das galegas, dous tantos por debaixo de María González, que anotou nove para o Liberbank.
Unha mostra do axustado do partido, que estivo especialmente igualado na primeira parte. Para a seguinte metade, as xogadoras de Isma Martínez non conseguiron manter o ritmo e un Liberbank Gijón concentrado logrou facerse co encontro.
Dous puntos separan a galegas e asturianas
Desde aquela primeira xornada, o Porriño seguiu sumando derrotas e algunha vitoria. As galegas foron superiores só ante dous conxuntos: o Club Balonmano Morvedre e o Rocasa Gran Canaria. Ademais, sumou un punto grazas ao empate ante o Balonmano Salud Tenerife.
Pola súa banda, o rival asturiano segue unha traxectoria similar. Con dous puntos máis, e dous postos por riba, o Liberbank Gijón ocupa a cuarta posición con tres vitorias e un empate.
As visitantes serán un rival duro, que adoita a asinar unha actuación similar á dos seus opoñentes. Na primeira volta da competición regular, as asturianas encaixaron 186 goles, polos 185 que marcaron.
DHF| Este sábado vuelve la #LigaGuerrerasIberdrola y nos enfrentaremos al @CBLaCalzada ‼️
⏰ 16:00
📍 Pabellón Municipal de O Porriño
🔴 En directo por @teledeporte #aRevolta pic.twitter.com/uYfU7FmhE8— Club Balonmano Porriño (@BmPorrino) January 14, 2021
A afección do Porriño poderá acceder ao pavillón
Para celebrar a volta da competición, e de acordo coas medidas sanitarias, ata 250 afeccionados do Porriño poderán achegarse ao pavillón da localidade para ver ás xogadoras. As persoas interesadas deberán reservar a entrada poñéndose en contacto co club de balonmán.
As interesadas deben enviar un correo a socios.bmporrino@gmail.com indicando nome, apelidos, DNI e teléfono. As entradas poderán ser recollidas este venres de 19:00 a 20:30 h ou o sábado antes do partido.
Para o resto de persoas que non poidan desprazarse ou non obteñan unha entrada, existe a posibilidade de seguir o partido en directo. A canle de Teledeporte será a encargada de retransmitir o encontro.
