Unha nova edición de Nocturnia chega á cidade da Coruña. O Concello pon en marcha este programa destinado a promover o lecer saudable entre a xuventude. A iniciativa, que durará ata o 21 de agosto, está dirixida ás persoas de entre 12 e 30 anos, que poderán inscribirse desde este mesmo luns na web www.coruna.gal/nocturnia.
Dentro das actividades deportivas a mocidade poderá desfrutar do aire libre con rutas interpretativas na cidade e noutras zonas de Galicia e navegacións diúrnas e nocturnas en goleta pola costa Ártabra. Tamén poderán participar no pádel surf, o kaiak, a escalada en rocódromo e en roca e a esgrima. Este último deporte chega coa novidade da modalidade láser.
Para dar a coñecer as opcións de mobilidade consciente e os seus beneficios o Concello da Coruña inclúe en Nocturnia rutas en bicicleta polos tramos ciclistas da cidade.
Ademais, tamén se realizarán obradoiros artísticos e artesanais de todo tipo, cun número de actividades que ascenden ás 140, destacando ás relativas ás artes escénicas. Debido á situación sanitaria, o programa comezará con prazas reducidas, seguindo os protocolos establecidos. Co paso dos meses, a normativa amoldarase aos cambios sanitarios.
Podes consultar todas as actividades dispoñibles nesta ligazón.
Como participar en Nocturnia?
Cando xa teñas decidido en que actividades queres participar, simplemente terás que inscribirte dentro dos prazos marcados. As inscricións son semanais, e abrénse os luns ás 16:00 horas, con peche o xoves ás 12:00 horas ou no momento no que se esgoten as prazas.
O requisito para acceder ao programa Nocturnia, ademais de entrar no tramo de idade, é cumprir coa normativa sanitaria vixente. O uso da máscara é obrigatorio e débense aceptar as condicións de participación no programa, que se porán en coñecemento de cada participante. É indispensable portar o DNI para participar nas actividades.
