- O Mecalia Atlético Guardés disputa a eliminatoria íntegra de oitavos de final da European Cup esta fin de semana na Sangriña contra o H71 das Faroe Islands (sábado e domingo, 19:00).
- Como xa sucedeu na rolda anterior, o equipo miñoto gozará do apoio da súa xente en ambos os encontros para tentar avanzar a cuartos.
- O conxunto feroés, novo e enérxico, chega á Guarda con ganas seguir adiante na competición europea.
Cando A Sangriña entra en escena, todo cambia. Cando Europa aparece, todo é distinto. Demostrouno o Mecalia Atlético Guardés o mes pasado cando lle tocou facelo e espera repetir esta fin de semana. Será na rolda de oitavos de final da EHF European Cup, que se disputa de forma íntegra no recinto guardés o sábado 14 e o domingo 15 (ambos os días ás 19:00 horas, coas cámaras da TVG2 retransmitindo en directo) co H71 Hoyvík das Faroe Islands como rival. Dous partidos para soñar. E máis despois da sensacional vitoria do colectivo da Guarda na pista do poderoso conxunto do Costa del Sol Málaga.
A vitoria do pasado mércores foi a primeira a domicilio deste curso. Encima, fronte a un candidato a todo e vixente campión de Copa. Máis que dous puntos. Unha inxección de moral espectacular para afrontar con máis garantías aínda unha segunda volta ligueira na que a escuadra miñota disputará en casa oito dos once encontros en xogo.
Iso será en Liga Guerreras Iberdrola. É Europa o que ocupa agora ás galegas que adestra Abel González. E o que ilusiona. O Mecalia Atlético Guardés facturou con senllos resultados contundentes os dous partidos que xogou no seu fogar. Foi hai un mes, na inauguración da reforma da Sangriña, co Juro Unirek VZV neerlandés como rival. Nesa terceira rolda da competición continental, o Mecalia venceu na ida do sábado (37-22) e repetiu na volta do domingo (35-17).
A aspiración é repetir dobre vitoria. Pero, por encima de todo, o máis importante é pasar de rolda. Os cuartos de final esperan no horizonte e un impulso como o da EHF European Cup é algo positivo para todo o demais. Así o entenden directiva, corpo técnico e xogadoras. Todos os estamentos do club están moi ilusionados con seguir subindo banzos. O seguinte chega do gran norte. Desde as Faroe Islands.
H71 Hoyvík, o equipo do Porto de Thor, habitual na European Cup
O H71 Hoyvík é un habitual desta competición e o gran dominador da liga do seu país, un arquipélago situado no medio do Atlántico, entre Dinamarca (cuxa coroa ten ascendencia aí) e Islandia. Trátase dun bloque de xogadoras moi novo, con tan só unha xogadora de 25 anos e unha notable cantidade de deportistas por baixo da vintena.
O rival das galegas xoga un balonmán enérxico e directo e poñerá toda a carne no asador para seguir viaxando por Europa. O club é nativo da localidade de Hoyvík, que, co seu crecemento das últimas décadas, pasou a ser un barrio da capital Tórsvhan, cuxo significado é, literalmente, Porto de Thor. Nesta ocasión, o porto que acollerá a acción será o da Guarda, coa Sangriña como martelo e as xogadoras de vermello e branco exercendo de Deusas de Asgard.
As xogadoras recuperáronse ben da longa viaxe a Málaga. Sobre todo porque gañar non cansa. Fóra de Júlia Nuez, todas están dispoñibles para a dobre cita. Xa se sabe que o que pega primeiro, pega dúas veces. Por iso, o conxunto miñoto sairá a por todas desde o minuto 1 do sábado, en busca dun bo resultado neste partido da European Cup que permita afrontar con plenas garantías a resolución do domingo.
Consultado sobre o rival neste torneo continental, o H71 Hoyvík, o adestrador das locais, Abel González, falad dun “equipo novo, que practica balonmán nórdico, con defensas pechadas e fortes en zona central”.
Abel González: “Temos ganas de volver á nosa casa e notar a calor do público”
