- As primeiras competicións de fútbol activadas, sempre que o permita a situación sanitaria, son: Preferente, Primeira Galicia, Primeira Galega Feminina e as ligas galegas de xuvenís, cadetes, infantís e alevín.
Nove meses levan en Galicia o fútbol sala e o fútbol sen actividade por mor da COVID-19. A Xunta vén de aprobar os protocolos da RFGF que permite activar as competicións de ámbito autonómico de xeito progresivo. O mellor dos regalos de Nadal para moitas deportistas que poderán retornar a practicar o seu deporte respectando os protocolos e sempre que a situación sanitaria o permita. O plan de desescalada ten tres niveis. No protocolo contémplase que as categorías sénior (masculina e feminina) e a liga galega xuvenil de fútbol deberán realizar un test do coronaviros cada 14 días. Todas as demais categorías de fútbol base e todas as competicións de futsal e gaélico deberán adestrar e xogar con máscara.
Xusto onte, luns 14 de decembro, cumpríronse nove meses desde que o 14 de marzo a Real Federación Galega de Fútbol (RFGF) decretase a suspensión das competicións de ámbito autonómico, provincial e local como consecuencia da evolución do coronavirus Covid-19. Naquel momento a responsabilidade fixo que a RFGF fose a primeira federación galega en suspender as súas competicións.
A mesma responsabilidade que fai que nove meses despois se decidise por reanudar a actividade unha vez que a Consellería de Sanidade e a Secretaría Xeral para o Deporte aprobasen os distintos protocolos de volta á actividade futbolística federativa con contacto.
A RFGF defende que “sempre foi coherente coa situación sanitaria e as recomendacións das autoridades. E tamén coa opinión xeralizada do fútbol galego, ao que escoitou nas distintas reunións mantidas tanto de maneira presencial como por videoconferencia. Por iso se optou pola prudencia á espera da evolución da pandemia”.
Explican desde a RFGF que agora, “nove meses despois, e co permiso explícito das autoridades competentes ao aprobar os protocolos de actividade con contacto, o fútbol e o fútbol sala galego volven a escena. Será un regreso graduado, con moito sentidiño e cumprindo escrupulosamente todas as normativas sanitarias e de seguridade. O noso deporte está a demostrar nas categorías nacionais que é seguro se se cumpren os protocolos. Os contaxios practicamente non existen, e aqueles que se producen fóra do entorno deportivo son rapidamente detectados grazas ás probas Covid que se fan periodicamente no fútbol. Precisamente é o noso deporte o que está axudando a detectar casos colaborando firmemente coas autoridades sanitarias”.
Unha desescalada con tres niveis para o regreso da competición
A RFGF optou por un “regreso progresivo da competición, fixando un proceso de desescalada en tres grandes bloques. Todo elo co obxectivo de reducir os riscos de contaxio, garantir o cumprimento dos protocolos e permitir unha mellor adaptación dos propios clubs e deportistas. E sempre cumprindo co compromiso de que se ían a deixar, como mínimo, entre cinco e seis semanas de pretempada para a preparación dos equipos”, explican.
O detalle, segundo remite a RFGF é o seguinte:
Nivel 1: Nun primeiro nivel de desescalada activaranse as competicións de carácter autonómico de fútbol, fútbol sala e fútbol base, sobre todo pensando naquelas que teñen ligazón coas de categoría nacional, aínda que se optou por poñer en marcha prácticamente todas as categorías de ámbito rexional.
- Preferente, Primeira Galicia, Primera Galega Feminina, Liga Galega Xuvenil, División de Honra Cadete, Liga Galega Cadete e Liga Galega Infantil en fútbol
- Preferente, Liga Galega Xuvenil, División de Honra Cadete, Liga Galega Cadete, Liga Galega Infantil e Liga Galega Alevín en fútbol sala
- Liga Galega de Fútbol Gaélico
Estas competicións quedarán activadas de inmediato e está previsto que o seu comezo se poida levar a cabo entre o 24 de xaneiro e a primeira semana de febreiro, sempre e cando o permita a situación sanitaria.
Nivel 2: Nun segundo bloque activaranse as demais categorías senior, así como as provinciais e locais de xuvenís, cadetes e infantís de fútbol, mentras que na especialidade de fútbol sala quedará todo activado nesta segunda fase. Competicións estas que previsiblemente poderán comezar durante a segunda quincena do mes de febreiro, sempre que o permita a situación sanitaria.
Nivel 2: O último nivel de activación refírese ao fútbol 8, que arrincará a finais de febreiro, sempre que o permita a situación sanitaria.
Test de detección da COVID-19 cada 14 días
A ORDE do 17 de setembro de 2020, da Consellería de Sanidade, sobre a modificación de determinadas medidas previstas no Acordo do Consello da Xunta de Galicia, do 12 de xuño de 2020, sobre medidas de prevención necesarias para facer fronte á crise sanitaria ocasionada pola COVID-19, establece, entre outras cuestións, que “a práctica da activdade deportiva poderá realizarse de acordo cos protocolos dos que deben dispoñer as distintas federacións deportivas”.
Ver esta publicación en Instagram
A citada orde engade que en ditos protocolos “deberá preverse que cando a actividade deportiva supoña contacto físico entre as persoas que a practican deberá utilizarse a máscara, salvo que no protocolo respectivo se inclúan medidas alternativas de protección específicas”.
Precisamente o protocolo da RFGF aprobado para as categorías sénior e a galega xuvenil establece “a realización de test serolóxicos, antíxenos ou similares cada 14 días, como medida de prevención ante a Covid-19”.
Detállase que esta esixencia “abrangue tanto os adestramentos coma os partidos, si ben é importante sinalar que é obrigado usar a máscara en todas aquelas situacións antes, durante e despois dos adestramentos e dos partidos que non requiran contacto físico, seguindo as directrices do protocolo aprobado pola Xunta de Galicia”.
O primeiro test deberá realizarse “ao inicio dos adestramentos e a partir de aí deberá repetirse cada 14 días. A Real Federación Galega de Fútbol ofrécese a garantir o suministro de test aos clubs que así o desexen e serán os propios clubs os que teñan a responsabilidade de realizar os test mediante a figura dun sanitario que certifique a realización dos mesmos”.
Axudas económicas da RFGF e da Xunta para pagar os test
A RFGF comprometeuse a “axudar aos clubs no financiamiento dos test e tamén a xestionar a colaboración da Xunta de Galicia nesta materia. Compromiso que se confirmou hai uns días co anuncio da Secretaría Xeral para o Deporte da convocatoria dunha liña de axudas de 2 millóns de euros para o deporte galego destinada a subvencionar gastos COVID-19, como é o caso dos test”.
Polo tanto, os clubs “recibirán unha importante axuda económica para facer fronte a eses gastos extras que supón a prevención contra o virus. Esta axuda da RFGF é subsidiaria respecto das subvencións e axudas públicas recibidas polo club polo mesmo concepto subvencionable”.
Os clubs terán a obriga de reportar os positivos ou situacións de risco
Todos os clubs estarán “obrigados a comunicar tanto á Federación como á Xunta de Galicia todos os casos positivos que poidan aparecer nos seus equipos e tamén calquera incidencia que supoña un risco de contaxio. Para elo establécense diferentes vías e procedementos que desde a RFGF se comunicarán aos clubs a través de circulares específicas”, segundo informa a Real Federación Galega de Fútbol.
De feito, “os clubs recibirán toda a información relativa aos plans competicionais, á inscrición nas categorías, aos efectos de non inscribirse, á normativa específica COVID-19 ou ao procedemento de solicitude e realización dos test, en distintas circulares que se irán publicando e que se emitirán aos clubs a través do sistema interno de comunicación (Intranet)”, relatan desde a federación.
A RFGF contará cun equipo para responder dúbidas
Co afán de estar a carón dos clubs e dos deportistas nunha situación tan especial e de tanda incertidume, a RFGF poñerá ao seu servizo un equipo de traballo exclusivo formado por técnicos federativos para dar resposta en todo momento a todas as dúbidas e preguntas que os clubs e deportistas poidan ter durante a tempada.
Desde a RFGF agradecen “ás administracións titulares das instalacións deportivas que permiten o correcto desenvolvemento da actividade dos nosos clubs e igualmente rogamos a súa colaboración para que esta actividade se poida levar a cabo con normalidade, sempre cumprindo cos protocolos aprobados”.
O presidente da RFGF, Rafael Louzán, e a súa Xunta Directiva, agradecen “profundamente a paciencia e a comprensión dos clubs, dos técnicos, dos deportistas, dos directivos e tamén dos afeccionados e familiares durante todos estes meses sen competición. Foron meses moi duros para todos e agora chega o momento de que todos unidos consigamos sacar adiante o noso deporte, pero sempre con moito sentidiño e cumprindo con todas as normativas sanitarias. Estamos convencidos de que o deporte é seguro, e os datos nos dan a razón, pero só se o facemos ben e seguimos todas as recomendacións das autoridades”.
A RFGF prepara plans competicionais pensados para unha tempada especial e reducida, sen ‘play offs’
