O equipo herculino do Viaxes Amarelle FSF, dirixido por Jorge Basanta, volvía competir na cancha, tras o parón da pasada fin de semana por motivo dos casos de COVID detectados no persoal laranxa; e facíao visitando a un rival que necesitaba puntuar para escapar da zona de descenso: o Comarcal A Fervenza FSF.
As herculinas mostráronse serias en ataque e conseguiron levar o derbi provincial fronte ao Comarcal A Fervenza FSF por un marcador de 1-6, grazas aos goles de María Gómez, Candela Soria (3), Patri Romaní e Lau Doce.
O partido empezaba cun Viaxes Amarelle FSF que levaba o mando do xogo co balón e buscaba a portería contraria para tentar adiantarse pronto; e a pesar de que as ocasións non tardaron en chegar, unha boa actuación da meta local, mantiña o 0-0 no marcador ata que aos sete minutos de xogo, María Gómez finaliza desde a interior da área un pase de Patri Romaní para subir o 0-1 ao marcador.
As locais apenas conseguían xerar perigo sobre a portería defendida por Sandra, grazas ao bo labor defensivo do Viaxes Amarelle FSF. Pouco despois da metade do primeiro tempo, Candela Soria finalizaba con disparo exterior a saída dun córner e poñía o 0-2 no marcador.
Seguían chegando as ocasións para o conxunto herculino, pero o gol resistíase e o partido iríase ao tempo de asueto co 0-2 no marcador.
Logo do paso por vestiarios, o Viaxes Amarelle FSF empezaba moi metido no partido e aos trinta segundos, Candela Soria finalizaba un ataque desde a frontal, e subía o 0-3 ao marcador. E pasando uns segundos a medianía do segundo tempo, Candela Soria conseguía asinar o seu hat-trick particular ao subir o 0-4 ao marcador, tras unha xogada persoal e disparo sobre o bordo da área.
O conxunto local non conseguía xerar perigo, e vía como as herculinas marchábanse no marcador; e máis cando apenas un minuto máis tarde, Patri Romaní subía o 0-5 ao marcador.
Xa con 5 goles en contra, o Comarcal A Fervenza FSF optou por sacar o xogo de cinco para tentar facer perigo sobre a portería de Sandra Rodríguez; pero non conseguían finalizar ningunha xogada.
Os minutos pasaban sen alteracións no marcador, ata que a falta de pouco máis de dous minutos para o final, Lau Doce conseguía subir o 0-6 ao marcador, tras unha presión alta do Viaxes Amarelle FSF sobre o conxunto departamental, e roubo en liña alta, para que finalizase a xogadora herculina.
As locais seguían optando polo xogo de cinco, e ao final conseguían subir un tanto ao marcador, cando nun ataque de cinco, María Gómez anotaba en propia porta o 1-6.
Seguintes retos do Amarelle e A Fervenza
Tras este novo partido oficial da tempada, o equipo regresará o luns aos adestramentos, para preparar o seguinte duelo da próxima fin de semana. O encontro correspondente á vixésima xornada da Segunda RFEF Futsal Feminina, terá lugar o sábado 2 de abril de 2022 no Pavillón Municipal de Sagrada Familia (A Coruña) ás 18:00 horas, recibindo ao Spring Cider Rodiles FSF, que ocupan a quinta praza na clasificación .
Pola súa parte, o Comarcal A Fervenza FSF xogará a vinveira semana contra o AD Mioño, novenas clasificadas. Será o domingo 3 de abril ás 13:00 horas no pavillón Portus Amanus.
🏁 Final do #FervenzaViaxesAmarelle
Derrota por 1-6 ante un gran rival pero no que competimos moi ben a pesar do resultado.
¡Seguimos! 🙏🏼 pic.twitter.com/gLdmpC1rgO
— Comarcal A Fervenza (@afervenzafsf) March 27, 2022
FICHA TÉCNICA
1) COMARCAL A FERVENZA FSF: Inés, Carmen, María Bertolo, Claudia e Jennifer – quinteto inicial – Tamén xogaron: Alba, Raquel, Antía, Julia, María Lence, Samai, Clara e Belén.
6) VIAXES AMARELLE FSF: Sandra, Lau Doce, Èlia Gullí, Carlita e Candela Soria – quinteto inicial – Tamén xogaron: Patri Romaní, Cris Lourés, Yaiza e María Gómez.
GOLES: 0-1 María Gómez (min. 7); 0-2 Candela Soria (min. 12); 0-3 Candela Soria (min. 21); 0-4 Candela Soria (min. 31); 0-5 Patri Romaní (min. 32); 0-6 Lau Doce (min. 38); 1-6 María Gómez (propia puerta) (min. 39).
EQUIPO ARBITRAL: Álvaro Darriba Rivas e Yago Seijas Piñeiro do Comité Técnico de Árbitros de Lugo. Mesa: Antía Cabanas Barja do Comité Técnico de Árbitros de Lugo. Amosaron cartón amarelo a Raquel, do Comarcal A Fervenza FSF, así como a Cris Lourés do Viaxes Amarelle FSF.
INCIDENCIAS: Partido correspondiente á décimo novena xornada do Grupo 1 da Segunda RFEF Futsal Feminino disputado o domingo 27 de marzo de 2022 no Pavillón Municipal de A Malata (Ferrol).