Derrota contundente do Viaxes Amarelle fronte ao líder, Pescados Rubén Burela. As da Mariña venceron ás da Coruña por 1-7.
O 2024 non empezou con bo pé para os intereses do Viaxes Amarelle FSF, que ademais de atravesar unha semana complicada con varias xogadoras afectadas co virus da gripe, perdeu o seu último partido da primeira volta fronte ao todopoderoso Pescados Rubén Burela.
As ausencias da cancerbeira Leti Rojo e de Lau Doce, por enfermidade, e a de Cris Lourés, por sanción, presentábanse como unha complicación extra para as coruñesas diante dun conxunto que chegaba á Sagrada Familia como líder da categoría. E o partido cumpriu cos malos presaxios para as locais, que foron bos para as visitantes do Burela.
Sobre a pista herculina viuse a un Viaxes Amarelle peleón pero sen a consistencia debida en defensa sucumbiu fronte a un líder sólido, que soubo manexar e ser manexado, que soubo atacar pero tamén reter e que non deu opción en ningún momento ao cadro local.
Triunfo 0-4 do Burela ao descanso
Aínda por riba, as lucenses adiantáronse no marcador na primeira acción de partido por mediación de Irene Samper. A propia Irene e en dúas ocasións Antía Pérez determinaron cos seus goles o resultado ao descanso. 0-4.
O segundo período estivo caracterizado pola boa intención do Viaxes Amarelle FSF, asentado nunha defensa máis avanzada, o que lle permitiu roubar algúns balóns en posicións altas aínda que sen lograr materializar.
Dany, Aroa e Emilly marcaron para o Pescados Rubén Burela, e Èli fíxoo para o Viaxes Amarelle FSF nunha bonita combinación.
As futbolistas herculinas céntrase xa no partido da próxima semana ante Lles Corts, no seu intento de abrir aínda máis fenda respecto a os postos de descenso.
Mentres o Pescados Rubén Burela visitará a cancha doutro galego, o Poio Pescamar que busca escalar na táboa clasificatoria da Primera División Iberdrola.
Ver esta publicación en Instagram
FICHA TÉCNICA
VIAXES AMARELLE: Yanira, Lobo, Èli, Carol e María León – cinco inicial -. Tamén xogaron: Marta Hermo, Pau, María Gómez, Carlita, Estela e Chuli.
PESCADOS RUBÉN BURELA: Caridad, Cilene, Irene Samper, Dany e Aroa – cinco inicial -. Tamén xogaron: Montoro, Cami, Rafinha, Antía, Emilly e Jozi.
GOLES: 0-1, min 0,40: Irene; 0-2, min 10: Irene; 0-3, min 17: Antía; 0-4, min 18: Antía; 0-5, min 24: Dany; 1-5, min 31: Èli; 1-6, min 32: Aroa; 1-7, min 33: Emilly
EQUIPO ARBITRAL: Adrián Calleja y Gael García, del Colegio Asturiano.
INCIDENCIAS: Pabellón Municipal da Sagrada Familia na Coruña.
