O Atlético Guardés sumou esta noite dous puntos moi importantes na primeira xornada do grupo polo título da liga Guerreiras Iberdrola. O equipo de José Ignacio Prades impúxose ao Balonmano Elche visitelche.com de Joaquín Rocamora (24-23, 12-11 ao descanso) nun partido que as locais tiveron de face co 6-2, se lles atragantou co 12-13 e o 14-15 ao fío do minuto 40 e ao cal souberon dar a volta para asegurar uns puntos que se antollan vitais (como o han ser todos até finais de maio) para poder asegurar a próxima tempada unha nova aventura por Europa.
Precisamente, coa vitoria de hoxe, as galegas se desquitan da derrota do pasado domingo co Rincón Fertilidad Málaga (18-23) na ida das semifinais da EHF European Cup e recuperan sensacións positivas de face a pelexar a remontada este sábado en Ciudad Jardín (19:00 horas). Sen tempo para saborear esta primeira vitoria na segunda fase da competición, a expedición sóbese mañá pola noite ao autobús rumbo á Costa do Sol.
Abriu marcador o Atlético Guardés (1-0) con gol de Paula Arcos. Primeiros minutos para tentear ao rival e entre o intercambio de goles e un ritmo rápido (1-1, 1-2, 2-2), o Guardés comezou a calibrar o seu xogo. Primeiro Paula Arcos. Unha pronta exclusión a Sempere e primeira inferioridade local, unha situación que tanto dano fixo ao equipo de José Ignacio Prades o domingo.
©SPORTCOECO
Esta vez, defensa que se rearma atrás, parada de Marisol Carratú e no seguinte ataque Sandra Santiago se escora polo lateral esquerdo para pór o 4-2. Ivet Musons, ao pau. Patrícia Lima, 5-2. O Balonmano Elche non acertaba, Marisol Carratú paraba e Sandra Santiago repetía a xogada anterior para abrir brecha (6-2).
Con este panorama, Joaquín Rocamora, o técnico visitante, pedía tempo morto no 12:52 ante o parcial de 5-0 local (do 1-2 ao 6-2). Entre Ivet Musons, Clara Gascó, Ana Martínez e as accións de Morales baixo paus, o BM. Elche conseguiu achegarse (7-6).
Rotacións no Guardés e baixo a batuta de Erika Rajnohová ou Patrícia Lima buscábase a Sarah Valero en seis metros, sen éxito. Paula Arcos, que hoxe celebraba a súa convocatoria coas Guerreras de cara aos dous partidos amigables que o combinado nacional disputará no abril, anotaba o 9-7.
A igualdade respirábase no ambiente e os dous equipos buscaban minimizar os fallos e controlar ás máis destacadas no seu rival. Cun apertado 12-10 chegouse ao peche do primeiro acto, e xa co tempo parado, Ivet Musons puido transformar os 7 metros que logrou a súa compañeira Nuria Andreu para o 12-11.
E empezou a segunda parte con malas noticias para o Atlético Guardés. Cun parcial de 0-2, as de Joaquín Rocamora, que non baixaban os brazos, volvían porse por diante (12-13) e aproveitaban a superioridade pola exclusión de Carla Gómez. Igualdade. Intensidade. Calidade. Ese tres calidades definen o que se viviu durante toda a segunda parte.
Unha enorme Paula Arcos destaca no Guardés
E tanto foi así que no minuto 50, o electrónico lucía un apertado 19-19. Dez minutos por diante con todo por decidir. Buforn, destacada durante os seus minutos en pista xunto a unha Paula Arcos que esta xornada estivo de doce (9 goles), anotou o 20-19 desde o 7m. Ivet Musons, fóra. E tempo morto de José Ignacio Prades que non quería sustos innecesarios.
Consumiu o Atlético Guardés os seus pases en advertencia de pasivo, pisando de Sarah Valero e de novo Tchapchet para o 20-20. Á seguinte, nunha xogada idéntica á anterior de Sarah Valero, 21-20. E uns minutos angustiosos. Resposta rápida visitante, golazo de Lima para o 22-21 ante unha defensa moi afundida e parada vital de Marisol Carratú, que volveu compartir protagonismo con Míriam Sempere.
O Atlético Guardés, moi listo, rascou un 7m que puxo o 23-21 e que obrigou a Joaquín Rocamora a pedir tempo morto para xogar os últimos dous minutos e 17 segundos e xestionar a inferioridade pola exclusión de Ana Martínez.
A defensa guardesa excedeuse tamén na súa intensidade e Patrícia Lima foi excluída, con 7m para o Balonmano Elche (23-22). Paula Arcos, xogando o 6 contra 5, 24-22. María Flores, 24-23 e aínda que José Ignacio Prades pediu de novo tempo morto. O Atlético Guardés puido celebrar once segundos despois a súa primeira vitoria na fase polo título da liga Guerreras Iberdrola.
O resultado acadado neste partido polo BM Atlético Guardés fai que as da Guarda poidan colocarse na cuarta posición da clasificación deste grupo polo título na Liga Guerreras Iberdrola. A táboa a comanda o Super Amara Bera Bera, seguido do Rocasa Gran Canaria (seguinte rival en Liga das da Guarda) e o KH-7 BM. Granollers. Esta vitoria ante o BM. Elche permite ás galegas xusto poñerser por riva delas.
Con esta inxección de moral, as galegas buscarán agora a remontada europea. Ciudad Jardín espera.
FICHA TÉCNICA
24) CLUB BALONMÁN ATLÉTICO GUARDÉS (12+12): África Sempere (1), Sandra Santiago (3), Martina Mazza (1), Lorena Pérez, Fani Descalzo, Miriam Sempere, Paulina Pérez (4), Patrícia Lima (2), Rosario Urban (1), Paula Arcos (9), Sarah Valero (1), Carla Gómez, Marisol Carratú, Erika Rajnohová (1), Laura Morais e Daniela Moreno (1).
23) BM. ELCHE VISITELCHE.COM (11+12 ): Ekaterina Zhukova, Carolina Bono, Giselle Beatriz, Celia Guilabert, Patricia Méndez, Nuria Andreu, Ivet Musons (5), Nicole Morales, María Flores, Patricia Encinas, Joana Bolling (2), Gabriela Clausson (3), Lysa Tchapchet (6), Clara Gascó (2), Ana I. Martínez (5) e María de Gracia Duque.
RESULTADO CADA 5 MINUTOS: 1-1, 4-2, 7-4, 8-7, 10-8, 12-11 (descanso) 14-13, 15-15, 17-16, 19-19, 21-20, 24-23.
ÁRBITROS: Jesús Álvarez Menéndez e José C. Friera Cavada. Excluyeron por parte de las locales a África Sempere, Patrícia Lima (2) e Carla Gómez y por parte del Elche a Giselle Menéndez, María Flores, Ivet Musons e Ana Martínez.
INCIDENCIAS: Partido correspondente á primeira xornada da fase polo título da Liga Guerreras Iberdrola celebrado na Sangriña con público limitado a 200 espectadores por mor das restricións á causa da pandemia de COVID-19.
