A vitoria escápaselle ao Celta no inicio da Fase Final (66-69)

Non puido ser. Un Celta Zorka Recalvi dominante durante o partido de estrea da Fase Final da LF2 perdeu a que tería sido unha vitoria importantísima ante o Barça CBS. As catalás precisaron unha épica remontada para levarse o encontro, que remataría nun 66-69.

“Mereciamos máis”, aseguraba na rolda de prensa posterior a adestradora celeste Cristina Cantero. As viguesas foron superiores durante os tres primeiros cuartos, chegando ao final cun colchón de 15 puntos, que inexplicablemente perderon ante unhas blaugranas que non perdoaron.

Todo indicaba que o trunfo era do Celta

Antes do partido, o nivel dos dous equipos facía presaxiar un encontro intenso e disputado. Así foi durante os primeiros minutos, no que o marcador apenas se movía.

Ao Celta custoulle entrar no partido, cun parcial en contra 5-11, pero unha vez o fixo, controlou os tempos do encontro. Conseguiron remontar no primeiro cuarto, que finalizou coas viguesas por diante, cun 17-14.

O segundo seguiu a mesma historia, cun conxunto galego cómodo na pista e que aproveitaba os rebotes para manter a vantaxe. Así, antes do descanso, a distancia pasou dos tres puntos aos nove, cun 33-24.

Tras o paso por vestiarios, o Barça seguía sen ideas mentre que as de Cantero non fallaban baixo o aro, chegando aos 17 puntos de diferenza coas catalás. O último tempo chegaba aparentemente decidido, cun 51-36.

Ata o último cuarto

Todo cambiou no cuarto final. Os nervios pasáronlle factura ao Celta, que non foi quen de aferrar o seu resultado, e mostrou unha cara completamente oposta á que deixou ver nos minutos anteriores. Pola súa banda, o Barça pasou de anotar 36 puntos en trinta minutos a anotar 33 en dez.

O bo partido feito ata este momento serviu para que, malia o mal momento que atravesaban as viguesas, estas seguiran por diante cun 59-47 a falta de catro minutos.

Pero as catalás viron a súa oportunidade de tomar o control do partido e asinar unha vitoria case imposible, e comezaron a sumar de tres en tres. As celestes víanse completamente ameazadas e non souberon reaccionar. “Fóisenos a cabeza nos últimos tres minutos”, admitía Cristina Cantero.

Así, xa no minuto final, o Barça colocouse por diante, a dous puntos do Celta, que xa non volvería a anotar nos segundos que restaban de partido. Cun 66-69 final, o soño galego de ascenso alónxase un pouco máis.

Cristina Cantero sinala o baixo nivel dos árbitros

“Non me gustou a situación de cambio de arbitraxe e descontrol, pero para os dous equipos. Creo que unha fase de ascenso necesita algo mellor”, denunciaba Cristina Cantero ante os micros da FEB.

A adestradora declarou que ambos técnicos están de acordo no baixo nivel que mostrou o equipo arbitral no partido: “O veño dicindo, hai que subir como sexa o nivel nese aspecto. Pelexamos moito todo o ano para chegar aquí e non podemos ter a sensación de que isto non pode ser. Podemos acertar o equivocarnos, pero non pode ser que os dous adestradores concordemos en que isto non pode ser”.

Cristina Cantero: “Podemos acertar o equivocarnos, pero non pode ser que os dous adestradores concordemos en que isto non pode ser”

Un exemplo desta mala praxis que apunta Cantero foron uns dobres pitados, que na súa opininón non o eran. “Non sei por que o pita, porque non eran dobles, que o miren ben porque non é”, insistía na rolda de prensa. A adestradora admite que non era un encontro fácil de pitar. Con todo, a sensación que se leva do partido é “triste”.

Sen tempo para lamentarse, o Celta ten que pensar xa no seu próximo partido, este mesmo venres ás 20:00 horas contra o Alcobendas. Por iso, Cristina Cantero prefire felicitar ao seu equipo e quedarse con que demostraron do que son capaces.

Cristina Cantero: “Pode haber un triplo empate, polo que temos que pelexar a morte”

“Pode haber un triplo empate, polo que temos que pelexar a morte, que é outro partido moi difícil e a repoñernos mentalmente e a volvernos a colocar no que son os nosos focos e no que temos que facer para gañar”, concluíu a celeste sobre o equipo da coruñesa Paloma Dorda.

Paloma Dorda: “A rivalidade Vigo – A Coruña sempre está aí, pero o afronto como un partido bonito e intenso”

Galería fotográfica do Celta vs Barça

1 de 19

- +