O Dépor ABANCA despide a Primera Iberdrola cun final agridoce, cunha vitoria en casa no derradeiro partido na máxima categoría. As futbolistas branquiazuis reencontraronse coa súa afección en Abegondo, na 34ª xornada co Athletic Club como rival, nun partido dominado polas locais, cun 3-0 final.
Con este triunfo final, as deportivistas din adeus á división de ouro na 15ª posición, con 29 puntos, a catro do SD Eibar, o último equipo salvado, e cun balance de oito vitorias, cinco empates e 21 derrotas.
Un Dépor ABANCA dominador
Desde os primeiros compases do partido, o Dépor ABANCA foi quen de dominar o tempo e o ritmo de xogo, ante un Athletic Club sen ideas en Abegondo. Porén, as coruñesas non chegaban a convertir as súas xogadas en ocasións claras, e as escasas oportunidades limitábanse a faltas colgadas á área.
Pasados os primeiros trinta minutos, as futbolistas locais conseguiron abrir a lata cun tanto de Ainoa Campo. O balón partiu dun córner botado por Lía, que a palentina foi quen de rematar de cabeza para meter o esférico entre os tres paus.
En menos de cinco minutos, o Dépor ABANCA reforzou o seu poderío cun segundo tanto. A árbitra Peñalver amonestou a Garazi por tocar a pelota coa man, dándolle un penalti ás galegas que Athenea se encargou de transformar.
As vascas continuaban xogando sen crear perigo, pero xusto antes do tempo de descanso, as visitantes tiveron a súa mellor oportunidade. Azkona cabeceu no segundo pau, superando a Sullastres, pero Blanco evitou o gol sobre a mesma liña da portería, sacando o balón.
Tras o paso por vestiarois, o guion seguiu a desenvolverse de xeito similar. Cun novo penalti por mans, desta vez de Moraza a disparo de Athenea, as herculinas puideron sentenciar o partido no minuto 64, cun novo tanto da cántabra.
Manu Sánchez aproveitou a vantaxe para dar saída a Villegas, Lía e Peke, despedidas con cariño desde a bancada. A vasca foi a máxima goleadora do equipo galego nesta tempada, con 10 goles, seguida pola internacional absoluta Athenea, que sumou oito. Os mesmo que Alba Merino, quen non puido estar presente neste encontro debido a unha lesión muscular nos isquiotibiales.
Nos minutos finais de partido, algunhas das substitutas tiveron a oportunidade de ampliar a goleada. Michelle Romero tivo unha gran ocasión demostrando a súa velocidade cunha internada pola esquerda no minuto 84. A gardameta do Athletic Club rexeitou o disparo e o balón quedo morto, onde Tati non chegou a tempo para enganchar o balón. Tres minutos despois, a debutante Marta Rico colleu un balón solto a 25 metros da meta, cun potente zurdazo que rozou o traveseiro.
Finalmente, sa branquiazuis non sumaron ningún gol máis, pero puideron despedir á afección brindándolle unha vitoria 3-0 ante o Athletic Club.
Debut da capitá da Selección Galega sub15
Outro dos aspectos positivos deste derradeiro encontro foi o debut de Marta Rico, capitá da Selección Galega sub15, no verde de Abegondo nun partido de Primera Iberdrola. O adestrador Manu Sánchez deulle a oportunidade de saltar ao céspede a falta de cinco minutos para o pitido final, tras a saída da internacional costaricense Stephannie Blanco.
Marta é unha das pezas fundamentais do combinado autonómico desde hai anos. A moza chegou á canteira do RC Deportivo procedente do Queixas e xamais esquecerá este 27 de xuño do 2021.
FICHA TÉCNICA:
DÉPOR ABANCA: Sullastres, Iris Arnaiz, Stephannie Blanco, Cristina Martínez, Villegas, Ainoa, Gabriela García, Lorena Bedoya, Rosalía Muíño, Athenea, Ainize Barea. Tamén xogaron: Tati, Michelle Romero, Eva Dios, Marta Rico e Patricia López.
ATHLETIC CLUB: Leguina, Valdezate, Garazi, Eunate, Oihane, Sophie Istillart, Monente, Irene Oguiza, Cirauqui, L. García, Azkona. Tamén xogaron: Moraza, Ibáñez, Nerea, Paula Arana, A. Sierra.
GOLES: 1-0 (min. 31, Ainoa); 2-0 (min-34, Athenea, penalti); 3-0 (min. 66, Athenea, penalti)
ARBITRAXE: Amy Peñalver, Rita Cabañero, Noelia Muñoz e María Torres. Amonestaron a Moraza, do Athletic Club. no minuto 65.
INCIDENCIAS: Partido correspondente á 34ª xornada de Primera Iberdrola, disputada na Cidade Deportiva de Abegondo.
