- O CRAT Residencia Rialta volve á senda do triunfo na Liga Iberdrola de rugby diante do CR Olímpico de Pozuelo.
Segundo partido en casa e segunda vitoria. O CRAT Residencia Rialta está empeñado en facer de Elviña un fortín. E, esta vez, houbo que empregarse a fondo para logralo. O marcador, 24-17 para as coruñesas, non reflicte suficientemente ben a igualdade do encontro.
O CRAT Residencia Rialta soubo sufrir e resolver o partido nos minutos finais. Catro puntos máis para as xogadoras que adestra o trío conformado por Pakito Usero,Jos Portos e Juan Carlos Fernández, que afianza ao bloque coruñés nos postos de privilexio da Liga Iberdrola de rugby.
Nas tres primeiras xornadas desta tempada, o guión de partido para o CRAT Residencia Rialta segue unha pauta: de menos a máis. Ocorreu diante di CR Sant Cugat, tamén Valladolid aínda que con peor resultado e, de novo, diante Olímpico. O primeiro tempo foi parco en anotación pero non tanto en erros por ambos os bandos.
O marcador moveuse pronto, cun gran ensaio de Quen Makkinga e a posterior transformación de Alejandra. A defensora visitante, Luz Martín, tivo que ser retirada en padiola por lesión cinco minutos despois. Entón, o xogo volveuse máis espeso.
O Olímpico de Pozuelo viña disposto a poñerlle as cousas difíciles ás coruñesas. As madrileñas, con apoios constantes e rápidos nos rucks, daban répilica en todo momento ás ofensivas do CRAT Residencia Rialta. E non foi ata o minuto 25 cando o marcador volvería moverse: Ana Sánchez anotaba o 7-5 co que se chegaría ao descanso.
As inclemencias meteorolóxicas respectaron, a pesar das previsións, o encontro, só o forte vento dificultou os tiros a paus, pero a choiva non fixo das súas. O Olímpico de Pozuelo, en cambio, se se presentou en Elviña e, no inicio da segunda parte, demostrou que viña a por a vitoria.
Silvia pousou e Ana Sánchez pasou entre paus para darlle a volta ao electrónico e situar un 7-12. O CRAT Residencia Rialta necesitaba unha reacción no xogo e no estado de ánimo. Ese impulso deullo Alba Martínez Alborota cunha galopada excelente con ensaio de premio na súa estrea en competición oficial co club herculino.
Pasaban os minutos e o CRAT Residencia Rialta melloraba e facíase dono do partido aos poucos. Maica, nunha xogada de poderío co seu selo persoal, ensaiou para poñer sete puntos de distancia.
Faltaba un cuarto de hora e a fenda era importante, pero insuficiente para eliminar a incerteza. O Olímpico de Pozuelo foi un durísimo rival que en ningún momento sucumbiu.
O Pozuelo colócase a 2 puntos do CRAT
A sete minutos do asubío final, Paula Coca ensaiou e puxo ás de Olímpico de Pozuelo a dous puntos.
Tocaba sufrir. Este CRAT Residencia Rialta é dos minutos finais. Crécese e recomponse. O traballo dos adestramentos vese reflectido aí. As coruñesas agarraron o temón e non o soltaron. Concentradas e cunha presión que o CR Olímpico de Pozuelo non puido contrarrestar, o CRAT Residencia Rialta sumou outro ensaio na súa conta, o segundo da neerlandesa Quen, para asegurar o triunfo.
Un resultado traballado e merecido que mantén ás galegas entre as catro primeiras clasificadas, os postos que permitirán loitar polo título ao final da campaña.
FICHA TÉCNICA
24) CRAT RESIDENCIA RIALTA: Tere Gálvez (min. 35, Miri), Ali, Maica; Maria Morant (min. 41, Kyra), Pimi (min. 40, Rumi); Judith, Maitane, Sina Hetet; Alba Lalín, Alejandra; Tani (min. 35, Elsa), Quen, Ceci, Alborota e Estela.
17) OLÍMPICO DE POZUELO: Marina Martín (min. 53, Isabel Ruiz), María del Castillo (min. 66, Ana Gómez), Sidorella; Marta Arriola, Cristina García; Amaya, Lia (min. 41, Amanda Prado), Miriam Vega; Andrea García, Paloma; Ana Sánchez, Blanca, Nora, Chiara (min. 41, Silvia) e Luz Martín (min. 12, Paula Coca).
MARCADOR:
5-0 min. 8, ensaio de Quen
7-0 min. 8, Transformación de Alejandra.
7-5 min. 25, ensaio de Ana Sánchez.
7-10 min. 55, ensaio de Silvia
7-12 min. 55, transformación de Ana Sánchez.
12-12 min. 58, ensaio de Alborota
14-12 min. 58, transformación de Alejandra.
19-12 min. 65, ensaio de Maica.
19-17 min. 73, ensaio de Paula Coca.
24-17 min. 78, ensaio de Quen.
EQUIPO ARBITRAL: David Joaquín Castro. Sen amonestadas nin excluídas.
INCIDENCIAS: Partido disputado no Estadio Universitario de Elviña coa presencia de numerosos alumnos de CPI Xanceda de Mesía.
