Disque que as alegrías cando se comparten valen dobre. E ese é o sentimento que ten o Atlético Guardés tras celebrar por primeira vez no que vai de 2021 unha vitoria coa súa afección. O público regresaba esta tarde ao Inferno da Sangriña e puido gozar de ver gañar o seu equipo gañando ao CICAR Lanzarote Cidade de Arrecife por 29-20 (18-9 ao descanso). O partido correspondía á xornada 13 da Liga Guerreras Iberdrola. A Sangriña vai carburando aos poucos e seguro que se converterá de novo nun apoio fundamental para o equipo que adestra José Ignacio Prades.
Coa calor do público o Atlético Guardés veuse arriba. Púxose o mono de traballo, transformouse nun auténtico vendaval e en pouco máis de dez minutos xa tiña o partido encarrilado. O minuto 11:28 e o marcador xa lucía un contundente 9-0 a pesar dos esforzos de David Betancort de deter a sangría (TM no 5:12 tras o 3-0 de inicio). Unha contundente defensa e moito atino de face a portaría foi a clave para que o Guardés asegurásese a vitoria nos primeiros compases. Un guion similar ao ocorrido en partidos moi recentes.
A partir de aí: rotar, dosificar e xestionar unha renda que se moveu en todo momento entre os 9-10-11 goles (Min. 28:41, 18-7 e Min. 38:44, 24-13) ata que o cronómetro chegou ao sesenta minutos de partido.
Quizá o castigo foi excesivo para o equipo lanzaroteño, que a pesar de ir a remolque todo o encontro, deixou moitos escintileos de calidade, como os potentes lanzamentos de Gabriela Romeu, a ex do Guardés, ou as paradas de Orowizc baixo paus.
A pesar do avultado do marcador (ao final, 29-20), na bancada a afección gozou animando de novo ás súas xogadoras. O ambiente, por fin caloroso e que tanto se bota de menos esta tempada, deixou o reencontro dos socios, o regreso da peña Inferno ao seu curruncho e esa celebración coral tan típica da Sangriña.
Prades moveu o banco do Guardés e volveu Martina Mazza
Para deleite dos afeccionados guardeses, José Ignacio Prades deu movemento ao banco e tamén aos sistemas defensivos e ofensivos: 5:1 con Sempere no avanzado, 6:0 contundente, a dupla Sempere –Gómez como dobre pivote.
E, por seguir sumando alegrías á tardee, Martina Mazza regresou tras unha longa lesión e desquitouse anotando tres goles e arrincando uns cuantos aplausos. A alegría dura no Atlético Guardés xa varias semanas encadeando catro vitorias consecutivas na Liga Guerreras Iberdrola.
Como anécdota, o liderado virtual das guardesas no Grupo, a falta de que se complete mañá domingo 28 de febreiro a xornada 13 e o resto de rivais póñanse ao día co seu partidos aprazados. Que a ledicia… dure máis!
FICHA TÉCNICA
29) CLUB BALONMÁN ATLÉTICO GUARDÉS (18+11): África Sempere (3), Sandra Santiago (3), Martina Mazza (3), Lorena Pérez, Estefanía Descalzo, Miriam Sempere, Paulina Pérez (6), Patrícia Lima (2), Rosario Urban (2), Paula Arcos, Carla Gómez (1), Marisol Carratú, Erika Rajnohová, Sarah Valero (2), Laura Morais (3) e Daniela Moreno (4).
2) CICAR LANZAROTE CIUDAD DE ARRECIFE SAN JOSÉ OBRERO (9+11): Esther Cabrera (1), Melania Cabrera (1), Nabila Harchaquin, Nagore Saenz, Sara de León, Alicia Torres (2), Gema Trujillo (2), Aleksandra Orowicz, Celia López (2), Gabriela Romero (4), Gabriela Pessoa (5), Priscila dos Santos (2), Paula Robayna, Ana Marín e Miriam Paez (1).
RESULTADO CADA 5 MINUTOS: 2-0, 7-0, 10-2, 12-3, 15-6 e 18-9 (descanso), 20-11, 24-14, 25-15, 26-16, 27-19 e 20-26 (final).
ÁRBITROS: Adrián Rodríguez Valdés e Francisco Fernández Ferreiro (Colexio de Asturias). Excluíron por parte das locais ás xogadoras Mazza, Buforn e Arcos; e das visitantes a Sara de León.
INCIDENCIAS: Partido correspondente á Xornada 13 do Grupo A da Liga Guerreras Iberdrola disputado no pavillón da Sangriña na Guarda con público, aínda que con aforo limitado por mor da COVID-19. Asistiron ao choque o alcalde da Guarda, Antonio Lomba; a concelleira de Deportes, Montse Magallanes; o deputado provincial, Gorka Gómez; e o secretario xeral para o Deporte da Xunta de Galicia, José Ramón Lete Lasa.
