Esta fin de semana Vista Alegre xogará pola igualdade, co partido correspondente á sétima xornada da Primeira RFEF Feminina das Guerreiras Laranxas. O cruce estará dedicado á loita pola igualdade efectiva de mulleres e homes.
O encontro será ante o FSF Móstoles, e está previsto para o sábado 13/11/21 ás 18.30 horas. Este partido poderá seguirse en directo por Live Vuvuzela | rfef.es, cunha mensaxe de sensibilización contra a violencia de xénero. As Guerreiras Laranxas ao completo presentaron o partido na Bomboneira.
A cita está encadrada no II Plan de Patrocinio dos Equipos de Alta Competición Femininos de 1º Máximo Nivel Estatal da Xunta de Galicia. O club mariñán xa foi un dos nove beneficiados a tempada pasada na estrea da iniciativa que este ano renova o seu compromiso con 26 entidades de diferentes modalidades deportivas (futsal, baloncesto, balonmán, fútbol, voleibol, rugby e sófbol), a través de deportistas que son exemplo non só nos éxitos sobre as pistas senón tamén a través das ensinanzas sobre o verdadeiro significado do compañeirismo, esforzo, traballo e superación.
Un Europeo que tamén berrará a prol da igualdade
Dentro das actividades programadadas en 2021, o club laranxa tamén visibilizará a loita pola tolerancia, a igualdade e a non violencia no deporte e na vida como anfitrión e organizador da competición internacional Futsal Women’s European Champions.
Esta competición disputarase entre o 2 e o 5, no Pazo dos Deportes de Lugo. Xunto ao Pescados Rubén Burela, como campión da liga española, formarán o Grupo 1 MFC Normanochka de Rusia e Osijek de Crocia. O Grupo 2 estára composto polo luso Benfica, Tesla de Ucraína e o italiano Pescara.
