O futuro do Dépor ABANCA pende dun fío, pero aínda hai posibilidades de conseguir a salvación. Este é o pensamento ao que se aferra o vestiario branquiazul. A propia Noelia Villegas, defensa do equipo, asegurábao así en rolda de prensa: “Seguen quedando opcións e penso que entre a preparación que levamos de traballo e as ganas e ilusión do equipo, creo que está dentro das nosas posibilidades. Non imos deixar de intentalo ata o último momento”.
A andaluza asegura que o plantel é consciente de que os tres partidos que quedan son importantes e é necesario vencer, pero o primeiro é o desta fin de semana, ante o Granadilla Tenerife, e por iso “haino que afrontar como o máis importante”.
Villegas xa conta con experiencia neste tipo de situacións límites, das que aprendeu que “todo se pode conseguir e aínda que as posibilidades sexan cada vez menos, e se crea que é imposible, sempre queda outra opción, outra oportunidade”.
O resto do equipo do Dépor ABANCA “está concienciado de onde estamos e o que temos que conseguir”. A defensa engade que “nese sentido creo que a xente está preparada e é consicente da situación na que estamos e creo que podemos saír dela”.
Noelia Villegas: “Os descansos ao final son importantes, igual de importantes incluso que o traballo”
Ademais, as branquiazuis non compiten na Primera Iberdrola desde hai case dúas semanas, un descanso previo aos últimos partidos da competición, e que foi positivo para as xogadoras: “Os descansos ao final son importantes, igual de importantes incluso que o traballo. Desconectar, relaxarnos un pouco, porque ao final a situación é complicada e dura e uns días libres sempre veñen ben”.
Un novo Dépor tras o partido ante o Granadilla
Na primeira volta, o Dépor ABANCA perdía por un 4-1 ante o Granadila Tenerife, no que foi o primeiro partido do 2021. Desta vez, a derrota supuxo un cambio na mentalidade do vestiario e desde entón as sensacións melloraron.
“Creo que a clave do noso cambio de principios de tempada a agora é a comodidade e a confianza que fumos collendo as xogadoras coa forma de xogar, co sistema. Creo que iso foi un punto a favor noso, que a xente comezara a atoparse ben e que foran saíndo mellor as cousas”, explica Villegas.
Noelia Villegas: “A clave do noso cambio de principios de tempada a agora é a comodidade e a confianza que fumos collendo as xogadoras coa forma de xogar, co sistema.”
Para esta nova xornada, Manu Sánchez e as súas xogadoras agardan un enfrontamento duro. Porén, o Dépor ABANCA prefire centrarse en si mesmo. “Creo que se facemos as cousas ben, o noso traballo estará refrexado no campo e ao final conseguiremos o que queremos. É máis importante iso, centrarnos en nós e conseguir o obxectivo. O rival é o menos importante”, apunta a andaluza.
De conseguir a salvación, as xogadoras do equipo coruñés xa están comezando a facer apostas, aínda que son un segredo de vestiario. “Saíron bastantes barbaridades que mellor as deixamos en segredo e veremos o resultado nun futuro se ao final o conseguimos”, confesa Villegas.
“Merecemos xa que a liga feminina sexa profesional”
Na vindeira tempada, a máxima categoría do fútbol feminino en España será profesional, como xa o é desde hai anos o seu equivalente masculino na categoría de ouro e de prata, ademais da primeira división de baloncesto masculino.
Un cambio anunciado polo Consello Superior de Deportes e que, en principio, modificará a lei o vindeiro 15 de xuño. Neste sentido, Noelia Villegas declarou que “é o ideal e o xusto. Merecemos xa que a liga feminina sexa profesional”.
Este foi un cambio paulatino que está a materializarse agora, tal e como recorda a xogadora: “Había moitas cousas das que pensabamos que non ían cambiar e ao final o fumos conseguindo. Esta será outra das cousas que as xogadoras e o entorno do feminino conseguiremos”.
