O campo de fútbol municipal de Berdón, o fogar do Vilagarcía SD, vestiu as súas mellores galas este sábado para acoller a celebración da segunda xornada da segunda edición da Nosa Champions Fútbol, a iniciativa integradora de responsabilidade social organizada pola Real Federación Galega de Fútbol (RFGF).
“A Nosa Champions Fútbol“ é unha liga integrada por equipos do colectivo DI (persoas con diversidade intelectual), que a RFGF puxo en marcha o curso pasado na modalidade de fútbol 7. Os obxectivos desta actividade son a normalización da práctica do fútbol no colectivo DI con este proxecto integrador e socialmente responsable.
Ver esta publicación en Instagram
A filosofía da Nosa Champions Fútbol” busca ofrecer a estas persoas a oportunidade de desenvolverse e vivir novas experiencias.
Éxito de participación na Nosa Champions fútbol
Logo do éxito da primeira edición a Real Federación Galega de Fútbol (RFGF) puxo en marcha a segunda tempada, a cal comeza xa coa gran noticia de duplicar o número de clubs inscritos, pasando de 6 a 12. Desde a RFGF queremos dar as grazas a todos os clubs que apostaron e apostan por este proxecto que nos enche de ilusión e que confiamos que siga tendo continuidade no tempo.
Unha competición especial da que sairá a Selección Galega Genuine
Lembramos que A Nosa Champions Fútbol é unha competición especial, precisamente sen ánimo competitivo, que fomenta a participación de equipos formados por persoas con diversidade intelectual. O obxectivo é promocionar o fútbol entre as persoas con diferentes capacidades co fin de concienciar de que o noso deporte non pon barreiras a ninguén. Os equipos son mixtos.
Unha novidade importante deste ano é que desta competición sairá a Selección Galega Genuine que participará no Campionato de España de fútbol praia.
Entrega de medallas
Ao termo desta segunda xornada da segunda edición da Nosa Champions Fútbol procedeuse á entrega de medallas a todos os equipos participantes. Na mesma participaron o presidente da Comisión Xestora da RFGF, Pablo Prieto; o presidente da Deputación Provincial de Pontevedra, Luis López; e o concelleiro de Deportes de Vilagarcía, Carlos Coira.
Ver esta publicación en Instagram
O Xabarín, un máis
O famoso Xabarín do Xabarín Club da TVG tamén quixo sumarse á festa e estivo presente nesta segunda xornada da competición. Todos os equipos participantes nesta segunda xornada de “A Nosa Champions Fútbol” recibiron o carné de honra do Xabarín Club.
