O triunfo na San Silvestre Ourensá no apartado feminino foi para corredora local Vicky Losada (Burgas Atletismo) 21:42. Seguírona a viguesa Elena Conde (TriPenta Terras de Lugo) 22:54 e a corredora do Carballiño Raquel Castro (Atletismo Arenteiro) 23:50.
Se entre as féminas gañaba Vicky Losada, na categoría masculina impúxose o corredor ourensá Rubén Díaz (Ourense Atletismo) cun tempo de 16:45. O segundo clasificado foi Amadeo Abal de Breña Baja e pertencente ao club ADAS Proinor con +8. O terceiro clasificado foi o corredor local Alexandre Álvarez (Club Ourense Atletismo) que entrou 1:09 por detrás do seu compañeiro de equipo e vencedor da proba.
A cita deportiva tiña limitada a inscrición a un máximo de 300 persoas e contou finalmente con 126 corredoras/es que cruzaron a liña de meta (100 homes e 26 mulleres) e 184 as persoas inscritas. Os primeiros en traspasala, Rubén Díaz e Vicky Losada.
O atletismo galego resístiuse a rematar o ano sen correr, así que nas diferentes cidades galegas se artellaron opcións para celebrar as típicas carreiras populares San Silvestre pero condicionadas pola pandemia de COVID-19. Cidades como A Coruña, Pontevedra ou Ourense viviron no final de 2020 e neste arranque de 2021 a San Silvestre, cada quen á súa maneira.
Na cidade de As Burgas as persoas participantes so podían retirar a máscara da súa faciana no momento de disputar a proba. Antes e despois de correr tiñan que protexerse e protexer ao resto de participantes poñendo a máscara para previr a transmisión da COVID-19. Determinouse tamén unha distancia de seguridade entre participantes que non saíron en bloque se non en quendas, un cada 2 minutos. Case como se fose unha contrareloxo.
Trazado
O circuíto da proba, de terra e asfalto, tiña unha lonxitude aproximada de 5,25 quilómetros, contando como superficie, principalmente, con terra compactada e con tramos de asfalto e pedra. A zona de saída emprázouse na explanada da marxe dereita do río Miño, baixo a rúa Ribeira de Canedo. Mentres que a meta situouse ao carón da oficina de Turismo da ponte vella
O percorrido da San Silvestre ourensá tivo o seguinte trazado: Parque Ribeira de Canedo – Pasarela C.C. Pontevella – Parque Miño – Rúa Díez de La Banda – Parque Portovello – Pasarela Avenida Ribeira Sacra – Paseo do Miño – Pasarela Oira – Paseo do Miño – Rúa Ribeiriño – Ponte Vella.
Houbo quen correu ataviado con peculiares vestimentas, algo habitual nas San Silvestre. Un xeito de aunar deporte e sorriso para rematar un ano para esquecer.
CLASIFICACIÓNS DA SAN SILVESTRE OURENSÁ, encabezada por Rubén Díaz e Vicky Losada