A xunta directiva do Viaxes Amarelle FSF reuniuse na serán deste mércores para tratar varios temas do club, e entre eles abordar as últimas noticias sobre a expansión do coronavirus COVID-19 nestas últimas datas, e que provocou a suspensión da competición oficial, tanto por parte da RFEF como da RFGF, para as próximas dúas semanas.
Chegando o conxunto herculino a tomar a decisión de suspender os adestramentos e actividades do filial e categorías inferiores que o club tiña programadas desde este xoves ata o vindeiro domingo 22 de marzo, e quedando a valoración posibles modificacións.
O club herculino non quere trasladar ningún tipo de alarma social ás súas xogadoras nin masa social, pero esta decisión vén dada para poder axudar ás autoridades competentes na contención deste novo virus.
O club tamén valorou os comunicados emitidos no día de hoxe polo Consello Superior de Deportes, a Real Federación Española de Fútbol e a propia Real Federación Galega de Fútbol na que se suspenderon todas as competicións oficiais durante as dúas próximas semanas. Este feito de que en competicións non profesionais non se vaia a competir, avala a decisión da entidade para suspender os adestramentos e actividades do club para o equipo filial e os equipos de categorías inferiores.
No relativo á decisión sobre o primeiro equipo do club, a decisión está aínda por decidir e pendente de valoración co corpo técnico do primeiro equipo, xogadoras e a propia xunta directiva, vendo a forma menos lesiva para a gran tempada que o equipo leva neste curso.
O club mantén un contacto directo cos organismos dos que depende, tanto RFGF, RFEF, como do Concello da Coruña e afrontarán posibles modificacións nas medidas inicialmente adoptadas, segundo novas informacións que se poidan dar nos próximos días ou semanas.
