Tres puntos en xogo moi importantes os que se disputan esta fin de semana o Viaxes Amarelle FSF e o Gran Canaria Teldeportivo que recuperar o partido adiado da terceira xornada. As galegas viaxan as illas para xogar contra un rival directo.
O conxunto herculino do Viaxes Amarelle FSF recupera esta fin de semana o partido aprazado polas tormentas ocorridas en Canarias o pasado mes de setembro. Farao coa vista posta en buscar os tres puntos en liza ante dun rival directo e tamén recentemente ascendido. As herculinas mediranse na tarde deste sábado 22 de outubro de 2022, a partir das 20:30 horas (21:30 horas na península Ibérica), na Cidade Deportiva Gran Canaria (As Palmas) visitando ao Gran Canaria Teldeportivo.
O conxunto herculino estivo traballando duro durante estas últimas dúas semanas para un partido que será protagonizado por dous conxuntos recentemente ascendidos. Máis que nunca, os puntos en xogo poden dirixir as seguintes xornadas da competición e ser decisivos. Actualmente hai sete equipos con tres puntos na clasificación da Primera División da RFEF FuSalFem que ocupan da décima á última posición da táboa. É nese bloque de sete equipos onde están ubicadas na táboa clasificatoria as herculinas e as canarias.
Baixas no Viaxes Amarelle para a viaxe a Gran Canaria
A escuadra herculina contará coas baixas de Estela Cantero e Carlita, que seguen en evolución das súas lesións; e a baixa de Khrystyna Stepanenko por estar na concentración da Selección Ucraína.
O técnico do club herculino, Jorge Basanta, convocou para esta nova viaxe da tempada ás porteiras Leti Rojo e Nerea Ramallo, así como ás xogadoras de pista, Cris Lourés, Carol Agulla, Clàudia Lobo, Èlia Gullí, María Gómez, Lau Doce, Tety, Marta Hermo, Daryna Tkachenko e Laura Rivas.
O rival que estará enfronte para o conxunto herculino, é un Gran Canaria Teldeportivo que ascendeu esta tempada á elite do futsal feminino, tras un paso fugaz pola segunda categoría nacional a pasada campaña, do mesmo xeito que fixeron as herculinas.
O conxunto das Palmas volveu á elite do fútbol sala feminino tras unha gran tempada en Segunda RFEF Futsal Feminina na que foron líderes do seu grupo con solvencia; xa na nova tempada na Primeira RFEF Futsal Feminina conseguiu sorprender na segunda xornada cunha importante vitoria por 0-2 en casa do Móstoles FSF; mentres que cederon derrotas fronte a Futsi Atlético Navalcarnero, LBTL Futsal Alcantarilla e Arriva AD Alcorcón FSF.
Ambos os dous equipos coincidiron na tempada 2020/2021 na Primeira RFEF Futsal Feminino. Nos encontros que disputaron nesa tempada, a vitoria sempre caeu ao lado herculino, aínda que con partidos moi disputados.
O conxunto herculino do Viaxes Amarelle FSF terá que saír á cancha con todos os sentidos postos no xogo e enfrontarse a un equipo que nestas primeiras xornadas da Primera División da RFEF FuSalFem demostrou unha gran solidez defensiva e unha moi boa actuación da súa porteira baixo paus.
A escuadra laranxa sabe que non é unha empresa fácil, pero pelexará por conseguir tres puntos que poderían ser importantes neste inicio de competición. Todo por decidirse na tarde do sábado 22 de outubro de 2022 na Ciudad Deportiva Gran Canaria (Las Palmas).
Retransmisión en streaming do Teldedeportivo vs Viaxes Amarelle
O encontro entre o Viaxes Amarelle e o Gran Canaria FSF Teldedeportivo vai ser emitido por streaming a través da plataforma da Real Federación Española de Fútbol (RFEF), e xestionado por ao vivo vuvuzela, como é habitual que aconteza cos partidos da máxima categoría do fútbol sala feminino estatal. Este cruce entre grancanarias e coruñesas vai poder ser seguido en directo a través da seguinte ligazón.
Nesta ocasión, a maiores, o partido entre canarias e galegas tamén se poderá seguirse a través de Canle 4 Canarias Deporte, na seguinte ligazón en YouTube.
