Duelo copeiro ao grande

O ano 2020 comeza coa sempre competitiva e sorprendente Copa da Raíña. Ademais, este ano a competición copeira ven marcada por varios cambios. Non se celebrará como agora entre os oito primeiros ao final da liga, senón que a disputarán os 16 equipos de Primeira e os catro primeiros de cada grupo da División de Prata. En total 32 equipos que xogarán tres roldas a partido único -en decembro, xaneiro e febreiro- para decidir os catro que se xogarán o título nun formato de Final Four.

Duelo de galos galegos

Nesta rolda enfróntase dous conxuntos galegos que están no máis alto da Primeira e da Segunda División. As coruñesas chegan a este partido de oitavos no máis alto da táboa da División de Prata con 26 puntos e tan só unha derrota.

O Viaxes Amarelle FSF regresa das vacacións á competición, cun partido complicado medíndose a un dos rivais máis complicados que se podía atopar nesta fase da competición de Copa. A pesar diso, as herculinas non descansaron durante as vacacións e tiveron traballo específico durante as fechas festivas.
O pasado xoves e venres tiveron sesión de adestramento para afrontar o duelo neste primeiro sábado do novo ano. O Amarelle ven de gañar en casa ao Cidade de As Burgas por 5-3, na rolda de 16ª de final xogada o pasado 6 de decembro.

Na presente tempada, os dous equipos non se enfrontaron en ningún partido, e este encontro exponse como un ilusionante partido. Jorge Basanta ten dispoñible a todo o persoal para afrontar este partido de competición de Copa S.M. A Raíña de Fútbol Sala.

 

1 de 12

- +

O Pescados Rubén Burela fixo o propio co Valdetires de Ferrol impoñéndose 0-2 na anterior rolda. As Guerreiras Laranxas son o único conxunto que consegue seguir a estela do imparable Futsi. As de Julio Delgado levan un gran comezo de tempada con 13 vitorias en 15 partidos. e sitúanse a 5 puntos do invicto conxunto madrileño. Ademáis, buscarán defender título xa que o equipo de Burela é o actual gañador da última edición copeira.

Cilene, coa moral polas nubes tras gañar a Copa América

“Amarelle vén de descender. Está facendo as cousas moi ben en Segunda, ten un bo equipo e sabe competir. Nós estamos preparadas para seguir avanzando en Copa. Queremos seguir dando pasos e pelexar por revalidar o título neste novo formato” advertía a 6 burelista, Cilene, tras a súa grande aventura coa selección de Brasil no mes de decembro. A brasileira acadou o título de Copa América e non podía ocultar o seu soriso: “Foi unha grande experiencia. Puiden regresar á selección logo dun tempo e con moi boas sensacións, ademais de alzarnos co campionato”, confesaba pletórica.

Cilene, peche do Pescados Rubén Burela: “O Amarelle vén de descender. Está facendo as cousas moi ben en Segunda, ten un bo equipo e sabe competir. Nós estamos preparadas para seguir avanzando en Copa. Queremos seguir dando pasos e pelexar por revalidar o título neste novo formato”.

Logo dun mes apartada do futsal español, a peche só pensa en laranxa. Primeiro na Copa, pero tamén en regresar á competición regular: “A liga é sempre unha motivación. Logo dun mes en Brasil tamén teño ganas das esixencias de liga e máis cun rival como Poio, co que estreamos a segunda volta o sábado 11. Tan só desexo que o novo ano sexa coma 2019. Para nós foi un ano espectacular. Oxalá poidamos seguir celebrando en 2020”, así inicia os propósitos de ano novo Cilene.

 

1 de 2

- +

Camila regresa por Nadal

A brasileira Camila Gadeia Silva regresa ao fogar laranxa. A peche, que defendeu o Pescados Rubén Burela FS nas dúas últimas tempadas, volve ao vestiario das Guerreiras despois de seis meses no seu país, onde conseguiu o Campionato Paulista e de Xogos Universitarios co São José, ademais de alzarse co título de Copa Amércia con Brasil, xunto a Cilene.

O club burelista está á espera da documentación necesaria para formalizar a contratación de Cami (São Paulo, 1990), que xa chegou á Mariña para pasar as datas de Nadal.

Julio Delgado e Lucas poderán dispoñer de todos os efectivos excepto de Dany, que arrastra molestias nun xeonllo, e Jane, no Brasil por temas administrativos.

Partido con carácter solidario

Este partido de Copa da Raíña, ademais de ter un grande atractivo deportivo, contará co engadido de ser unha cita solidaria. Así, o vindeiro sábado ás 18:00 horas no Pavillón Municipal da Sagrada Familia será testemuña dunha xornada na que, a parte do gran partido entre os dous conxuntos galegos, a entrada servirá de donativo a favor do Banco de Alimentos Rías Altas.

Despois da boa aceptación da última xornada solidaria, a favor da Protectora de animais APADAN, as herculinas repiten neste primeiro partido do ano con outra xornada solidaria.

Nesta ocasión, o beneficiario será o Banco de Alimentos Rías Altas. Para poder colaborar, solicítase aos espectadores que acudan ao encontro que participen achegando un litro de leite. Para aqueles que non dispoñan de posibilidade de acudir con esa achega, poderán realizar unha achega económica de 1 €.

Resto de partidos de Copa