O Viaxes Amarelle FSF, dirixido por Jorge Basanta, tratará de retomar a senda da vitorias no grupo 1 da Segunda División Nacional Feminina FS recibindo a visita dun equipo que encadea un refacho de tres partidos consecutivos sen perder. O Viaxes Amarelle FSF afrontará a décimo sétima xornada este sábado 22 de febreiro de 2020 ás 18:00 horas no Pavillón do Complexo Deportivo de Elviña I (A Coruña) enfrontándose ao Osasuna Lacturale Orvina.
O conxunto pamplonica ocupa actualmente a sexta posición da xeral, con 21 puntos tras conseguir 6 vitorias, 3 empates e 6 derrotas nos quince enfrontamentos que leva disputados ata a data. É o quinto equipo máis anotador da competición con 40 goles a favor. Ademais, é o sexto equipo que menos goles encaixa, con 38 goles en contra. Actualmente encadean un refacho de tres xornadas consecutivas sen perder, e na cuarta xornada anterior quedou nun axustado marcador contra O Fisgón Futsal (3-4).
O coxunto galego tratará de retomar o refacho de vitorias, despois de volver empatar contra o Comarcal A Fervenza FSF a pasada fin de semana, nun partido onde as herculinas tratarán de demostrar que seguen moi metidas na competición, e que a pesar das baixas que acumulan, son capaces de manter a cabeza da táboa unha xornada máis. Será unha proba de lume para ver se son capaces de convivir coa presión de compartir liderado co Fisgón Futsal. As xogadoras de Jorge Basanta afrontan un partido complicado, pero estarán concentradas para volver sumar de tres en tres.
