Volve o sorriso do Viaxes Amarelle por entroido. As galegas acadan unha nova vitoria, tras impoñerse por un marcador de 6-1 ao Osasuna Lacturale Orvina, tras os goles de Patri Romaní, Irune Santesteban (2), Patri Corral, María Gómez e gol de Irati en propia porta. Ademais coa vitoria desta fin de semana, e a derrota do Fisgón Futsal, as herculinas consolídanse co liderado en solitario con 41 puntos.
O encontro empezaba cun Viaxes Amarelle FSF envorcado en ataque sobre a portería das visitantes, e tras varias ocasións erradas, aos dous minutos de xogo era Patri Corral a que mandaba un balón ao segundo pau que tocaba nunha defensa visitante e coábase ao fondo da rede para subir o 1-0 ao marcador. O partido continuaba cun conxunto local envorcado no ataque, pero non eran capaces de ampliar distancias, mentres que as visitantes tentaban reaccionar á contra, pero as boas accións de Sandra, permitían manter a vantaxe no marcador das herculinas.
A falta de sete segundos para o tempo de asueto, Patri Romaní aproveiou un rexeite dun disparo de Yaiza, e puxo o 2-0 no marcador. Tras o tempo de asueto, o Osasuna Lacturale Orvina empezou envorcado en ataque e atopou o seu premio aos dous minutos cun gol de Susana, tras un balón axustado ao pau.
A pesar do gol, as herculinas non baixaron os brazos, e apenas cinco minutos máis tarde ampliaban distancias ao poñer Irune Santesteban o 3-1 tras finalizar unha xogada de estratexia de saque de banda. As herculinas non baixaron o ritmo, e seguiron pelexando por ampliar distancias, e a falta de cinco minutos para o final do encontro, Patri Corral finalizou unha boa xogada de estratexia de saque de esquina e poñía o 4-1 no marcador.
Con esta distancia no marcador, as visitantes optaron por saír con xogo de cinco, e as herculinas aproveitaron para anotar dous goles máis. O primeiro de María Gómez desde 30 metros a falta de 4 minutos, e o 6-1 a falta de 2 minutos cun disparo de Irune Santesteban desde 38 metros. As visitantes non baixaron nunca os brazos, pero as galegas conseguiron defender a vantaxe obtida e reencontrarse así de novo cos tres puntos.
Tras este novo encontro da tempada, o Viaxes Amarelle regresará o luns ao traballo, para preparar o seguinte partido que terá lugar este próximo martes en competición de Copa Galicia Feminina. As herculinas afrontarán o partido de ida de semifinal de Copa Galicia Feminina FS o martes 25 de febreiro de 2020 ás 12:00 horas no Pavillón Municipal de Sacra Familia (A Coruña) contra o Burela Pescados Rubén FSF.
FICHA TÉCNICA
VIAXES AMARELLE: Sandra, Patri Romaní, Irune Santesteban, María Gómez, Patri Corral (cinco inicial), Yaiza, Inés Suárez, Nuria González.
LACTURALE ORVINA: Leire, Irati, Susana, Amaya, Iris (cinco inicial), Sandra, Ana, Maider, Olaya, Maite.
GOLES: 1-0 Irati (propia porta) ( min. 2); 2-0 Patri Romaní ( min. 20); 2-1 Susana ( min. 22); 3-1 Irune Santesteban ( min. 26); 4-1 Patri Corral ( min. 10); 5-1 María Gómez ( min. 37); 6-1 Irune Santesteban ( min. 38).
COLEXIADOS: Manuel Dans Rey e Marcos Pérez Rodríguez do Colexio de Árbitros da Coruña. Mesa: Inmaculada Silva Martínez do Colexio de Árbitros da Coruña.
TARXETAS: Yaiza do Viaxes Amarelle FSF (Tarxeta Amarela). Susana do Osasuna Lacturale Orvina (Tarxeta Amarela).
INCIDENCIAS: Partido correspondente á 17 xornada do Grupo 1 da Segunda División Nacional Feminina FS disputado o sábado 22 de febreiro de 2020 no Pavillón do Complexo Deportivo de Elviña I (A Coruña) entre o Viaxes Amarelle FSF e o Osasuna Lacturale Orvina.
