- Festival de goles do Viaxes Amarelle FSF ante o 5 Coruña FS ao vencer por un contundente 8-0 no primeiro derbi entre estes conxuntos herculinos en categoría estatal.
Son da mesma cidade, teñen a mesma paixón polo que fan, pero os seus obxectivos deportivos para este curso 2021-22 difiren totalmente. Así se comprobou sobre o parqué do pavillón municipal da Sagrada Familia. O Viaxes Amarelle FSF aspira e está chamado a loitar por estar no play-off de ascenso. Mentres que o 5 Coruña FS, acabado de chegar á categoría estatal, ten por meta mater esa condición e asentarse na Segunda División do fútbol sala feminino da RFEF. Así, pese a que un derbi é un derbi e que cada partido é un mundo, as laranxas pasaron por encima das vermellas (esta vez de branco) sen paliativos.
O equipo herculino do Viaxes Amarelle FSF afrontaba este fin de semana o seu primeiro partido da tempada como local e facíao nun derbi herculino, inédito en competición nacional, tras o ascenso do 5 Coruña FSF esta tempada. O conxunto laranxa fixo valer a súa superioridade sobre a cancha para conseguir sumar un +3 no seu casilleiro tras imporse por un marcador contundente de 8-0, grazas aos goles de Candela Soria (2), Carlita (2), Lau Doce, Èlia Gullí, María Gómez e Cris Lourés.
O partido empezaba con dous equipos moi nerviosos sobre a cancha, que non conseguían dar a fluidez suficiente ao xogo, pero aínda así xa chegaban as primeiras ocasións para a escuadra laranxa nos primeiros segundos de xogo.
O gol tampouco se fixo esperar moito, pois Candela Soria adiantaba ao Viaxes Amarelle FSF aos dous minutos e medio de xogo, cando finalizaba unha rápida contra, nun un para un coa meta visitante (1-0).
Aínda quedaba partido, e ningún dos dous equipos atopábase o suficientemente cómodo, chegando a ter uns minutos uns pouco tolos; onde o Viaxes Amarelle FSF xeraba perigo sobre a cancha, e o 5 Coruña FSF lograba saír rápidas á contra, pero sen conseguir finalizar ningún ataque, tras rápidos repregamentos do cadro local.
Posibilidade de empatar para o 5 Coruña FS ao fío do descanso
O Viaxes Amarelle FSF fiel ao seu estilo mantivo en todo momento unha presión de balón alta, mentres que as visitantes optaron por unha defensa en media cancha, para evitar que as laranxas fixesen dano sobre a portaría defendida por Leti Rojo. E a falta de tres minutos, o 5 Coruña FSF tivo a oportunidade de igualar a contenda nun un para un de Sarai con Leti Rojo, onde a porteira laranxa actuaba rápida para repeler o disparo do conxunto visitante.
E cando restaban dous minutos para chegar ao tempo de descanso, chegaba un saque de banda para o Viaxes Amarelle FSF, no que Patri Romaní sacaba o esférico para enviarllo a Candela Soria, quen xogaba a pelota con Èlia Gullí. Esta última xogadora foi que n de irse do seu par e tocala atrás. Aí agardaba Carlita que, desde o punto de penalti, puña o 2-0 no marcador. Foi ese o resultado co que ambos os dous conxuntos porían rumbo a vestiarios.
Logo do descanso, o conxunto laranxa continuaba coa súa presión de balón alta ao rival e buscando xerar o perigo suficiente para ampliar a renda no marcador; e aos dous minutos de xogo, e froito dun saque de esquina que executaba Cris Lourés directo á liña de portaría, onde Lau Doce tocaba con sutileza para pór o 3-0 no marcador.
Pola contra, o 5 Coruña FS seguía apostando por unha defensa a media pista, e tentar roubar en liña alta para aproveitar unha contra, aínda que non conseguían xerar perigo sobre a portaría de Leti Rojo.
O Viaxes Amarelle FSF seguía xerando ocasións de perigo, pero o 4-0 faríase esperar até o minuto 25 de xogo, cando nunha presión alta do Viaxes Amarelle FSF sobre a saída de balón visitante, Carlita recupera un balón, que toca rápido con María Gómez, a cal llo devolve a Carlita, que non perdoa o gol, coa porteira xa batida.
A falta de oito minutos para o final do tempo regulamentario, chegaría o segundo de Candea Soria, cando nun bo disparo exterior batía a Nati Barral e subía o 5-0 ao marcador. Co quinto gol, o 5 Coruña FS optaba por subir un pelín máis a liña de presión. De feito optou por probar o xogo de cinco coa súa propia porteira, pero o Viaxes Amarelle recuperaba rápido o esférico e Cris Lourés probaba cun balón en longo que sacaba San, pero no rexeite recupérabao María Gómez. A capitá optou por xogar con Èlia Gullí, a que non desaproveitaba a súa ocasión, sen porteira, para pór o 6-0 no marcador.
Co partido xa vencido, o 5 Coruña FS subiu un pelín máis a liña de presión, para tentar roubar e recortar distancias no marcador; pero isto non fixo máis que darlle máis mobilidade ao xogo do conxunto laranxa, que se atopaba cómodo coa presión do 5 Coruña FS. E xa a falta de algo máis de catro minutos de partido, chegaba un gol de falta, que transformaba Cris Lourés, cun disparo de aproximadamente 10 metros, moi axustado ao pau da portaría defendida por Nati Barral.
O Viaxes Amarelle FSF, a pesar de ter o marcador de cara, e o tres puntos decidido, non se relaxou e seguiu apertando alto o balón. Precisamente froito diso chegou unha recuperación de Èlia Gullí, que a xogou de primeiras con María Gómez, e esta puxo o oitavo e definitivo gol da tarde, que deixaba o tres puntos para o Viaxes Amarelle FSF.
Tras este segundo partido oficial da pretemporada, tocará volver ao traballo, coa mente posta en preparar o encontro do próximo fin de semana no Grupo 1 da Segunda División do FutSalFem da RFEF.
A terceira xornada de liga, terá lugar para o Viaxes Amarelle FSF o sábado 23 de outubro de 2021 no Pavillón Municipal Gonzalo de Berceo (Logroño) a partir das 19:30 horas, visitando ao Promesas EDF Logroño.
No caso do 5 Coruña FS atamén xogan o sábado 23 pero farano como locais no Pavillón Municipal de Novo Mesoiro recibindo ao AD Mioño ás 18:00 horas.
FICHA TÉCNICA
8) VIAXES AMARELLE FSF: Leti Rojo, Patri Romaní, Cris Lourés, Yaiza e Candela Soria – quinteto inicial-. Tamén xogaron: Lau Doce, Carlita, Èlia Gullí, María Gómez e Sandra.
0) 5 CORUÑA FSF: Natalia Barral, Alba Rodríguez, Ainhoa, María Romero e Sarai – quinteto inicial-. Tamén xogaron: Sandra, Toro, Alba Canosa, Marta Fra, Leny e Alba Vázquez.
GOLES: 1-0 Candela Soria (min. 2); 2-0 Carlita (min. 18); 3-0 Lau Doce (min. 23); 4-0 Carlita (min. 25); 5-0 Candela Soria (min. 32); 6-0 Èlia Gullí (min. 33); 7-0 María Gómez (min. 36); 8-0 Cris Lourés (min. 36).
ÁRBITROS: Roberto Amor Vizoso e Alejandra Bujía Piñeiro-Varela do Comité Técnico de Árbitros de Ferrol. Mesa: Berta García Vázquez do Comité Técnico de Árbitros da Coruña. Amonestaron a Ainhoa del 5 Coruña FSF con dobre cartón amarelo.
INCIDENCIAS: Partido correspondente Á segunda xornada do Grupo 1 da Segunda RFEF Futsal Femenino disputado no Pavillón Municipal da Sagrada Familia da Coruña.
