As coruñesas do Viaxes Amarelle seguen na posición de ouro da táboa tras gañar por 3-5 na casa do Rodiles. A pesar do resultado, a priori abultado, as herculinas chegaron ao último minuto cun marcador de 1-5 a favor, pero os últimos 30 segundos foron unha tolemia. Dous goles en 30 segundos deron vida ás locais. Aínda así, as galegas mantiveron os tres puntos no seu poder, cun marcador final de 3-5.
O encontro comezaba co dominio das galegas e cun Amarelle que quería ter o coiro e comezar gañando. A boa defensa local non facía posible abrir a lata, pero aos oito minutos de xogo un desaxuste defensivo local provocou unha contra de Martita e Irune Santesteban que acabou transformando Zaida. Aínda quedaba moito partido por diante, e a pesar dos intentos, as galegas non se atopaban cómodas sobre a pista, aínda que non tiñan serio perigo polas locais e mantiñan a vantaxe do 0-1 ao chegar ao tempo de asueto.
Na continuación, as herculinas saíron coa intención de poder ampliar distancias, pero volvían atopar cun rival moi pechado e moi centrado en tarefas defensivas, pero aos oito minutos de xogo Yaiza aproveita un rexeite, tras xogada de estratexia, para poñer o 0-2 no marcador.
Tras este segundo gol herculino, as locais optaron polo xogo de cinco para tentar recortar distancias, e María Gómez aproveitaba tras un roubo en xogo de cinco local, para transformar o 0-3 a falta de nove minutos para o final do partido. As locais seguían tentando recortar distancias, pero eran incapaces de abrir a lata, mentres que o Viaxes Amarelle FSF poñía o 0-4, a falta de dous minutos para o final.
30 segundos finais de infarto
Tras o tanto do Rodiles que poñía o 1-4 no marcador, as galegas dispuxeron de dous dobre penaltis, e mentres o primeiro íase por fóra, na segunda oportunidade, Patri Corral poñía o 1-5, a falta de 40 segundos para o final do partido. Pero chegou a tolemia. Nos últimos 30 segundos, o conxunto astur foi un bulebule anotando dous tantos. Primeiro por obra de Goyache á saída dun córner e posteriormente Sonia anotaba o 3-5 definitivo a falta de seis segundos para a conclusión do tempo regulamentario.
A pesar destes últimos segundos, onde as herculinas non atoparon o seu sitio na cancha, o partido púidose resolver cunha vitoria satisfactoria para o Viaxes Amarelle FSF que conserva o liderado do Grupo I da Segunda División Nacional Feminina FS. O Fisgón Futsal, outro conxunto galego, continúa ao rebufo na segunda posición, tras a súa vitoria na xornada de hoxe por 6-1 ao Comarcal A Fervenza FSF.
Tras este novo encontro da tempada, o Viaxes Amarelle FSF alternará diferentes sesións de traballo nas próximas semanas, para preparar o partido de oitavos de final da Copa de S.M. A Raíña, e onde as herculinas terán que actuar de locais, no partido que se disputará o sábado 4 de xaneiro de 2020 ás 18:00 horas no Pavillón Municipal de Sacra Familia (A Coruña) recibindo ao Burela Pescados Rubén FSF.
Xornada solidaria do Rodiles FSF en Villaviciosa
O conxunto herculino tamén colaborou na xornada solidaria que tiña esta fin de semana con motivo do último partido do ano e a proximidade coas festas de nadal e Reyes. As galegas achegaron varios peluches para a recollida realizada polo Rodiles nunha campaña baixo o lema de “Ningún neno sen xoguete”.
FICHA TÉCNICA
RODILES FSF: Zaira, Goyache, Lau Fernández, Clara, Paje (cinco inicial), Romina, Sonia, Candi, Isa, Alonso.Viaxes
VIAXES AMARELLE FSF: Tami, Yaiza, Irune Santesteban, María Gómez, Patri Corral (cinco inicial), Martita, Patri Romaní, Inés Suárez, Reneé, Zaida, Nuria González.
GOLES 0-1 Zaida (min. 8); 0-2 Yaiza (min. 22); 0-3 María Gómez (min. 31); 0-4 Zaida (min. 38); 1-4 Sonia (min. 39); 1-5 Patri Corral (doble penalti) (min. 39); 2-5 Goyache (min. 39); 3-5 Isa (min. 39).
COLEXIADOS: Gael García Schimid y Verónica Laura Fernández Vega del Colegio de Árbitros de Asturias. Mesa: Jonathan Peláez Abella del Colegio de Árbitros de Asturias.
TARXETAS: Goyache, Clara y Sonia del Rodiles FSF (tarxeta amarela). Reneé del Viaxes Amarelle FSF (tarxeta amarela).
INCIDENCIAS: Partido correspondente á undécima xornada del Grupo 1 de la Segunda División Nacional Femenina FS disputado o sábado 21 de noviembre de 2019 no Pavillón Municipal Manuel Busto (Villaviciosa – Asturias) entre el Rodiles FSF y el Viaxes Amarelle FSF.
