O Viaxes Amarelle FSF deu comezo á pretemporada onte, luns 16 de agosto, na cancha do pavillón municipal da Sagrada Familia na Coruña. Hoxe, martes 17/8/21, o equipo da Coruña anunciaba a incorporación da futbolista catalana Élia Gullí ás filas do club que, un ano máis, adestra Jorge Basanta.
Chegou o final das vacacións para o primeiro equipo do Viaxes Amarelle FSF, coa volta aos adestramentos. As laranxas deron os seus primeiros pasos da tempada 2021/2022, na que lles toca competir na Segunda RFEF Futsal Feminina, co obxectivo de poder entrar nos play-off de ascenso ao final deste novo curso que inician.
O equipo, que continuará baixo a dirección técnica de Jorge Basanta, realizou tamén os primeiros test de antígenos da tempada e, posteriormente, tiveron unha charla de presentación para continuar co primeiro adestramento da nova tempada no Pavillón Municipal da Sagrada Familia.
O plantel que terá ás súas ordes Jorge Basanta, xa foi anunciado na súa maior parte, nas últimas semanas nas redes sociais do club. A portería estará defendida por Leti Rojo e Sandra Rodríguez; e como xogadoras de pista renovaron o seu compromiso co club, Candela Soria, Patri Romaní, Cris Lourés, Yaiza, María Gómez e Lau Doce.
Ademais para a presente tempada incorporarase a canteirá Carla Martínez ás filas do primeiro equipo. O cadro herculino tamén conta con dúas incorporacións xa confirmadas, que serán presentadas nos próximos días. Deste xeito o bloque quedará conformado por nove xogadoras de campo e dúas porteiras.
O Viaxes Amarelle FSF anuncia a fichaxe de Élia Gullí
A futbolista catalana Élia Gullí incorpórase ás filas do Viaxes Amarelle FSF da Coruña procedente do FF Cervera – Segarra. Trátase dunha xogadora nova, de 21 anos, que acumula xa na súa traxectoria varias internacionalidades coa Selección Española en categorías inferiores (sub-17, sub-19 e sub-21).
Ver esta publicación en Instagram
Aínda que a plantilla podería considerarse curta, varias xogadoras do conxunto filial van estar na pretemporada co primeiro equipo, e poderán ter a oportunidade de disputar minutos no primeiro equipo. O club tampouco descarta a incorporación dunha última xogadora ao primeiro equipo herculino.
O cadro coruñés ten por diante oito semanas de preparación antes do inicio da competición oficial do Grupo I da Segunda RFEF Futsal Feminina; na que se estreará visitando a cancha do UDC Txantrea KE.
Oito galegos de 14 no Grupo I da Segunda RFEF FutSal Feminina
O grupo no que compiten o Viaxes Amarelle FSF, estará composto por 14 equipos, dos cales 8 son galegos. Ademais do propio equipo coruñés, encádranse no mesmo grupo os seguintes equipos da nosa comunidade: ARB 5 Coruña FS, Valdetires Ferrol FSF, Comarcal A Fervenza FSF, FSF Castro, Bembrive FSF, Cidade de As Burgas FSF e o Ourense Envialia FSF B.
Tamén conformarán o grupo o Rodiles FSF (Asturias), AD Mioño (Cantabria), CD Gora (Bilbao), Club Deportivo Promesas EDF (Logroño), CD Universidade de Salamanca e o UDC Txantrea KE (Pamplona).
Durante a pretemporada, o equipo da Sagrada disputará varios partidos amigables contra equipos de Primeira RFEF Futsal Feminina e Segunda RFEF Futsal Feminina; así como participará na Copa Galicia Feminina FS.
