O equipo herculino do Viaxes Amarelle FSF afrontaba o primeiro partido oficial da presente tempada visitando a cancha do 5 Coruña FSF, nun particular derbi herculino de XV Copa Galicia Feminina FS. Os dous equipos apostaron por unha presión alta de balón. O Viaxes Amarelle FSF terminou dando un golpe de autoridade cun xogo rápido e que conseguía xerar ocasións de perigo constantes que terminaron por dar a vitoria ás de Jorge Basanta, tras impoñerse por un marcador de 1-10.
Os goles das de Jorge Basanta foron asinados por: Carlita (2), María Gómez, Lau Doce, Candela (2), Yaiza, Laura Rivas, Patri Romaní e un en propia porta do 5 Coruña FSF.
O partido daba comezo co saque de centro do Viaxes Amarelle FSF e nese momento xa se viu a aposta do equipo de Fani Martínez cunha presión alta de balón, e aínda que nos primeiros instantes sorprendía, o conxunto de Jorge Basanta íase asentando no xogo e xeraba as primeiras ocasións de perigo, conseguindo subir o 0-1 ao marcador aos tres minutos de xogo cun tiro exterior de Candela, que acaba tocando en Natalia Sandá en última instancia.
Sen apenas tempo a dixerilo, o Viaxes Amarelle FSF seguía buscando a portería contraria e aos catro minutos de xogo chegaría o 0-2, por medio de Carlita que recupera en media cancha, xógaa co á e na parede recibe ao medio e bate no un para un á porteira visitante.
O partido íase poñendo de fronte para o Viaxes Amarelle FSF, que pouco antes dos seis minutos de xogo conseguía poñer o 0-3 no marcador, cun gol de María Gómez, que remataba no segundo pau, un roubo de balón de Marta Hermo na presión sobre o 5 Coruña FSF. Xa na medianía do período, chegaría o 0-4 nas pernas de Carlita que finalizaba cun disparo exterior de 7 metros, un roubo de balón de Èlia.
O Viaxes Amarelle FSF tiña o partido encarrilado e parecía que segundo pasaban os minutos deixábase ir un pouco, e o 5 Coruña FSF empezaba a xerar algunha ocasión de perigo, polo que chegou un tempo morto a falta de seis minutos e medio para o final do primeiro tempo. Iisto pareceu un revulsivo para as visitantes que terminaron esta primeira parte ampliando distancias ata o 0-6. Primeiro cun gol de Lau Doce, nunha xogada que recupera a propia Lau en cancha propia, xógaa con Candela e esta devólvelle o balón a Lau Doce, que finaliza en gol, a porta baleira.
Logo chegaría o sexto do Viaxes Amarelle FSF, por medio de Candela Soria que finalizaba unha recuperación de Èlia ao bordo da área e abría o balón para que Candela non perdoase o gol.
Tras o paso por vestiarios, e co partido xa encamiñado por parte do Viaxes Amarelle FSF, ningún dos dous equipos deixaba de exercer unha presión alta. Yaiza abría ao minuto de xogo tras aproveitar un balón morto ao bordo da área, tras un primeiro disparo de María Gómez á saída dun córner, e que é entorpecido pola defensa local.
Xa co 0-7 no marcador, o 5 Coruña FSF conseguía recortar distancias a falta de 16 minutos, tras unha xogada de estratexia que finalizaría Toro no segundo pau e levaba o 1-7 ao marcador.
O 5 Coruña FSF insuflaría alento co gol, e seguía coa presión alta, pero o seu esforzo seguía sendo insuficiente para xerar perigo sobre o conxunto visitante. Xa na medianía do segundo período, Laura Rivas cun potente disparo exterior, a pase de Èlia, poñía o 1-8 no marcador. Apenas uns segundos máis tarde, anotaba un gran gol tras unha saída de presión perfecta, que Candela en última instancia vira sobre o seu par e cun balón cruzado axustado ao poste acaba anotando o 1-9, cando restaban dez minutos de xogo.
O Viaxes Amarelle FSF aínda terminaría por anotar un gol máis, a falta de sete minutos de partido, cando Patri Romaní finaliza no segundo pau un pase de Candela Soria. Xa co partido máis que resolto, ambos os equipos seguiron buscando as súas ocasións, pero o marcador permaneceu xa inalterable no 1-10.
Seguinte rival do Amarelle, o Burela
O marcador dá o pase de fase ao conxunto de Jorge Basanta á seguinte fase da competición. O seguinte partido de XV Copa Galicia Feminina, correspondente a cuartos de final, tería que disputarse a próxima fin de semana do 11 de setembro fronte ao Burela Pescados Rubén FSF, en horario e instalación aínda por determinar; aínda que actuando como equipo local, o conxunto herculino.
O Viaxes Amarelle FSF continúa traballando para chegar nas mellores condicións ao comezo de liga, e tras este partido contra un rival recentemente ascendido á competición de Segunda RFEF Futsal Feminino. Agora tocaría enfrontarse contra o vixente campión de liga, Copa e Copa Galicia, o Burela Pescados Rubén FSF.
FICHA TÉCNICA
1) 5 CORUÑA FSF: Nati Barral, Alba Rodríguez, Sandra, Ainhoa, Sarai (cinco inicial), Natalia Sandá, Toro, Alba Canosa, María Romero, Leny, Noa, Marta, Alba Vázquez, Tami Gándara.
10) VIAXES AMARELLE FSF: Sandra Rodríguez, Lau Doce, Yaiza, Élia, Candela Soria (cinco inicial), Patri Romaní, Carlita, María Gómez, Marta Hermo, Laura Rivas, Ana Bermúdez, Leti Rojo.
GOLES: 0-1 Natalia Sandá (propia puerta) (min. 3); 0-2 Carlita (min. 4); 0-3 María Gómez (min. 6); 0-4 Carlita (min. 10); 0-5 Lau Doce (min. 17); 0-6 Candela Soria (min. 18); 0-7 Yaiza (min. 21); 1-7 Toro (min. 24); 1-8 Laura Rivas (min. 29); 1-9 Candela Soria (min. 30); 1-10 Patri Romaní (min. 33).
ÁRBITROS: Eloy Bello Gómez y Mario Salinas García del Colegio de Árbitros de Ferrol. Mesa: Roberto Pena Porta del Colegio de Árbitros de Lugo. Sen tarxetas.
INCIDENCIAS: Partido correspondente á fase previa da XV Copa Galicia Femenina de Fútbol Sala disputado no Pavillón Municipal de Novo Mesoiro (A Coruña) entre os equipos coruñeses do 5 Coruña FSF e o Viaxes Amarelle FSF. Derbi herculino.
