Despois de case dous meses desde que se suspendese a competición regular de liga, o Viaxes Amarelle FSF que adestra Jorge Basanta, coñeceu onte, venres, a resolución oficial de dar por concluídas as competicións regulares; quedando desta maneira, o equipo herculino, como primeiro clasificado e Campión de Liga do Grupo 1 de Segunda División Feminina FS. As segundas clasificadas foron as futbolistas do Fisgón que adestra Pili Costa, e as terceiras as do Valdetires. Coa competición finiquitada na súa fase regular, as coruñesas aspiran agora a subir de categoría.
A RFEF terá que comunicar nas próximas semanas as datas para a disputa do play-off exprés, que as herculinas terán que disputar para optar a conseguir unha praza na Primeira División Nacional Feminina FS de cara a próxima tempada.
A Comisión Delegada da RFEF, reuniuse este pasado venres 8 de maio para resolver a proposta realizada pola Xunta Directiva da propia federación; que establece finalizar as ligas regulares das competicións federativas de ámbito estatal sen descensos, así como disputar a fase final ou play-off, no caso de habelo, en formato exprés e sen afluencia de público, salvo en categorías xuvenís onde se dá por terminada a tempada e practícanse os ascensos.
Segundo informa o Viaxes Amarelle, “ademais na Comisión Delegada deste venres, en relación cos play-off de ascenso, pendentes de disputarse, establécese que, se por calquera razón non puidesen disputarse a totalidade dos partidos previstos nas competicións non profesionais, a Comisión Delegada debería adoptar un novo acordo para a fixación do sistema de finalización das competicións”.
A gran tempada das herculinas, que a data de finalización da competición ocupaba a primeira posición do grupo 1 de Segunda División Nacional Feminina FS, con 44 puntos conseguidos, tras sumar 14 vitorias e 2 empates nos 16 partidos que levaban disputados até o pasado mes de marzo.
A vantaxe das herculinas era notable neses momentos, pois adiantaban en 6 puntos ao segundo clasificado, cun partido menos disputado que estas; e con 13 puntos de vantaxe sobre o terceiro clasificado, e un partido máis que estas.
Os números do Viaxes Amarelle FSF
A dinámica do cadro herculino era moi boa, pois ao momento de finalización da competición, o Viaxes Amarelle FSF sumaba 99 goles a favor e encaixara só 19 goles en contra. Estes números fanlle o equipo que menos goles encaixou en todos os grupos da Segunda División, e o segundo que máis goles levaba anotados, aínda que tendo as galegas o mellor cociente de goles/partido.
A pesar do confinamento, o corpo técnico continuou dando traballo específico para que as xogadoras tentasen ir mantendo a forma física. Nesta última semana, xa puideron traballar de forma individual ao aire libre; para poder ir recuperando o tono, e ir poder preparar adecuadamente a disputa do play-off exprés.
Sen prazos para o play-off
De momento, aínda é unha incógnita os prazos que se poderán manexar para finalizar os play-off de ascenso; e mesmo desde a propia Comisión Delegada, deixan no aire a posibilidade de disputar nas correctas condicións sanitarias os citados play-off, pero aínda así as herculinas teñen que ir preparando o traballo para a disputa da fase de ascenso.
Contan desde club herculino que, segundo informacións da propia RFEF, “espérase que ao longo desta próxima semana póidase reunir a Comisión Delegada da RFEF, para establecer prazos e formatos dos play-off exprés de ascenso á Primeira División Nacional Feminina FS, e os equipos poder ir planificando da mellor forma posible”.
Segundo explican desde o Viaxes Amarelle “aínda que os equipos son conscientes que co proceso de desescalada que se está levando no país, é probable que todos os equipos non poidan acudir ao play-off de ascenso nas mesmas condicións, debido á apertura de instalacións e poder volver realizar os adestramentos en grupo; así como a volta das xogadoras dos equipos á súa disciplina, desde as súas respectivas localidades”.
Parabéns da directiva ao grupo
Desde a directiva e todos os compoñentes dos diferentes equipos do club, transmiten “a máis grande das felicitacións para o primeiro equipo e corpo técnico que traballou duro para poder conseguir estar no máis alto durante toda a tempada, e sen permitirse erros; o que finalmente lles deixou que consolidasen o liderado e meterse no play-off de ascenso, a pesar da suspensión das competicións a falta de 8 xornadas para a súa conclusión”.
