A oitaba xornada da Primera División da RFEF do FutSalFem conta cun derbi galego protagonizado por Viaxes Amarelle e Ourense Envialia. Ambas as dúas escuadras están separadas na clasificación unicamente por dous puntos así que xóganse a posición na táboa. Agora mesmo as coruñesas son décimas con 8 puntos e as ourensás undécimas con 6. En xogo hai tres puntos. A cita está fixada para hoxe sábado 12 de novembro ás 18:00 horas. no Pavillón da Sagrada Familia da Coruña.
O conxunto herculino do Viaxes Amarelle FSF, dirixido por Jorge Basanta, regresa a competir como equipo local, e faio nun derbi galego especial, con dous equipos que están separados na táboa por só dous puntos. As visitantes buscarán o desquite do partido de Copa Galicia.
As coruñesas aproveitaron esta semana para facer un traballo de recuperación, despois de que a semana pasada as xogadoras disputaron tres encontros e tiveran que realizar máis de 2.300 quilómetros. A escuadra herculina afronta este novo derbi galego con moitas ganas de poder puntuar de novo en casa, e tratar de sumar a primeira vitoria en casa. Unha asignatura que aínda teñen pendentes as futbolistas laranxas.
O técnico do club herculino, Jorge Basanta, convocou para este novo derbi galego na competición da regularidade, ás porteiras Leti Rojo e Nerea Ramallo, así como ás xogadoras de pista, Cris Lourés, Carol Agulla, Clàudia Lobo, Èlia Gullí, María Gómez, Lau Doce, Carlita, Tety, Khrystyna Stepanenko, Marta Hermo, Laura Rivas e Daryna Tkachenko.
O rival que estará enfronte para o conxunto herculino, é un Ourense Envialia FSF que actualmente ocupa a undécima posición da xeral con 6 puntos, cultivados tras 2 vitorias e 4 derrotas, nos seis encontros que disputaron ata a data. Suman 19 goles a favor, e encaixaron 18 tantos en contra.
As ourensás atópanse dous puntos por baixo das herculinas, aínda que teñen un partido menos disputado, tras o seu aprazamento fronte ao Joventut d’Elx. O equipo dirixido por Raquel Mondoruza, Mondo, conta cun bloque de xogadoras para aspirar a unha zona máis alta da táboa, aínda que o seu inicio de liga contra rivais da talla de Futsi Atlético Navalcarnero, Burela Pescados Rubén FSF, STV Roldán e Melilla Sport Capital Torreblanca FS, cos que cederon derrotas axustadas; pero impuxéronse ao Marín Futsal e ao Móstoles FSF cun marcador moi amplo.
Nesta nova tempada ambos os conxuntos enfrontáronse en partido oficial de Copa Galicia Feminina de Fútbol sala. Aquel derbi foi un partido moi igualado, que as coruñesas aguantaron cun marcador de 1-1 ata o final do tempo regulamentario, e tras a quenda de penaltis, as herculinas deixaban fóra da competición autonómica ao subcampión da pasada tempada.
O conxunto herculino tratará de sumar puntos contra un rival, que a pesar da súa posición actual na táboa, aspira a estar nunha zona cómoda da táboa e pelexar por metas máis altas. Tócalles a ambos os dous equipos gozar sobre a cancha deste derbi galego e pelexar polos puntos na tarde do sábado 12 de novembro de 2022 no Pavillón Municipal de Sagrada Familia (A Coruña).
Retransmisión do derbi galego en directo por TVG2 e streaming
O encontro será emitido en diferido a través da TVG2 na tarde do domingo, e emitirase en directo desde a plataforma de g24.gal. Tampouco faltará á cita a emisión por streaming a través da plataforma da Real Federación Española de Fútbol, e xestionado por Live Vuvuzela; podendo seguir en directo o encontro a través da seguinte ligazón: https://youtu.be/G6bCH1RWQmY.
