- Non queda nada, horas, para que o Viaxes Amarelle FSF e o Cidade de As Burgas GLS empecen a súa andaina no play-off de ascenso desde a Segunda División do futsalfem á máxima categoría desta disciplina en España.
A Primeira División do Fútbol Sala feminino estatal ten actualmente catro equipos galegos Pescados Rubén Burela, Poio Pescamar, Ourense Envialia e ENCE Marín Futsal. Se todo sae ben para os representantes da nosa comunidade neste play-off que está a piques de iniciarse, o vindeiro curso Galicia podería ter seis equipos na élite española. Serían seis clubs dun total de 16.
O sistema de competición fai que coruñesas e ourensás leven camiños diferentes nos cruces, así que é perfectamente factible que ambos os dous equipos acaden o premio do ascenso ao final do play-off.
O soño de volver á elite está moi preto. O Viaxes Amarelle FSF e o Cidade das Burgas xa contan as horas para a disputa das eliminatorias polo ascenso á máxima categoría do fútbol sala feminino español. O conxunto herculino está a 40 minutos de regresar á Primeira RFEF Futsal, mentres que as futbolsitas ourensás deberá superar un camiño máis longo para alcanzar a gran meta.
Un partido pode abondar ao Viaxes Amarelle para acadar o ascenso
No caso do club herculino as xogadoras que prepara Jorge Basanta pelexarán polo ascenso directo hoxe, sábado 4 de xuño, a partir das 18:00 horas no Pavillón Municipal da Sagrada Familia (A Coruña). As galegas reciben ao conxunto La Boca Te Lía Futsal Alcantarilla. Se gañan ese partido, son equipo de primeira. Así que so 40 minutos e un gol máis cas súas rivais as separan da gloria.
O elenco que prepara Basanta afronta con normalidade unha semana que será clave para a loita das herculinas por poder devolver o club á máxima categoría nacional do futsal feminino.
É importante coñecer o formato do play-off de ascenso da presente tempada debido a que como na competición existen catro grupos e só hai tres ascensos directos á Primeira RFEF Futsal Feminina.
Nesta primeira eliminatoria, os equipos que se clasificaron como primeiros dos seus respectivos grupos mídense entre si, por enfrontamentos segundo coeficientes; e os gañadores desta primeira eliminatoria, a partido único, conseguirán o ascenso á elite do fútbol sala feminino, mentres que os perdedores poderán dispoñer dunha opción nunha segunda fase eliminatoria.
É dicir, se gaña o Viaxes Amarelle FSF, xa ascende, pero de darse o caso de que perdera, aínda podería ascender ao ter unha nova opción na fase eliminatoria.
O Cidade de As Burgas ten un camiño máis longo ata á elite
Esta fin de semana tamén arrinca o camiño polo regreso á elite para o Cidade de As Burgas GLS que adestra Manolo Codeso. Será tamén hoxe, sábado 4 de xuño, desde as 19:30 horas. No seu caso falamos dunha eliminatoria de cuartos de final (a partido único). As ourensás vanse medir conxunto galego co estremeño do UD La Cruz Villanovense.
As ourensás foron segundas no Grupo 1 e as de Villanueva de la Serena remataron cuartas no Grupo 3, aínda que beneficiadas as pacenses de que por diante terminasen dúas filiais, o do Roldán murciano e o do Melilla. Doutro xeito, nesa posición non terían accedido a esta fase competitiva.
A folla de roteiro cara ao ascenso é fácil de entender. Os dous primeiros clasificados dos catro grupos de Segunda accederon ao play-off. Os campións van por unha banda, pois entre os catro xogan dúas eliminatorias da que saen dous ascensos. Os dous perdedores reenganchan como cabezas de serie na rolda de semifinais, ante os gañadores dos outros dos cruces dos segundos clasificados. Nesta rolda de cuartos de final é onde entra en escena un Cidade de As Burgas que tivo que esperar ata a penúltima xornada para asegurarse o sitio no play-off.
Superar tres finais non será sinxelo: a primeira o sábado na casa, a segunda ante un campión de grupo como visitante, e a terceira e definitiva só como local se se enfronta a outro segundo.
Quen dixo medo? Pódese!
