- Búscanse pemes e persoas autónomas dispostas a apostar polo fútbol sala feminino coruñés a cambio de que a súa marca se vexa beneficiada por un “retorno publicitario relevante para a súa actividade”, razón: Viaxes Amarelle FSF.
- O club quere dar pasos na profesionalización das súas futbolistas, pero precisa contar con máis recursos económicos que intenta conseguir cun formato de co-patrocionios.
O conxunto coruñés do Viaxes Amarelle FSF lanza unha campaña de co-patrocinadores para seguir medrando como club no futsal feminino. Neste momento o club está a menos dun ano de chegar ao seu 25 aniversario. Desde a entidade plantexan un modelo de crecemento do club sostible ao longo do tempo. Ademais queren dotar ás súas xogadoras de condicións que se avancen no camiño da súa profesionalidade.
O Viaxes Amarelle FSF actualmente pódese considerar “un referente de fútbol sala feminino na provincia da Coruña, pero como é habitual canto máis se crece, maior dotación de recursos económicos necesita unha entidade. É por iso que, de fronte esta nova tempada 2021-2022, o club lanza unha campaña de co-patrocinadores, coa mirada posta nos autónomos, pequenas e medianas empresas da provincia que decidan apostar polo deporte feminino”, explican desde a entidade coruñesa.
“Nos últimos anos o club conseguiu meterse na elite do fútbol sala feminino cuns recursos moi limitados, chegando a ser un dos clubs con menor orzamento da competición nacional. Con todo, actualmente e co camiño da profesionalización da categoría, a entidade herculina aposta pola profesionalización como club, e isto provoca un gran incremento dos gastos”, detallan.
De feito para esta nova tempada 2021-2022, o club decidiu que “todas as xogadoras do primeiro equipo, teñan licenza profesional e estean dadas de alta en seguridade social. Dotándoas dunha garantías que poucas entidades están a facer actualmente, pero é o camiño para poder dar o salto no deporte feminino”, aseguran desde o do Viaxes Amarelle FSF.
No club expresan que pensando “sempre no beneficio das xogadoras, o club conta cun corpo técnico de luxo, que non adoita ser habitual na categoría que disputará esta tempada, pero que tamén se considera o máis adecuado para que as xogadoras poidan crecer en formación”.
E se de formación falamos, non podemos esquecernos da calidade de corpo técnico coa que o club coruñés conta ano tras ano en filial e equipos de base, onde podemos destacar que a pasada tempada o club foi campión galego en categorías alevín feminino e infantil feminino, e subcampión en categoría cadete feminino. Na opinión do do Viaxes Amarelle FSF todo isto é “froito do traballo e esforzo sen límite dun club, que sempre o deu todo; pero cada vez faise máis complicado conseguir a sustentabilidade económica da entidade sen dispoñer de patrocinios privados”.
As pemes e as persoas autónomas, como aliadas
O club herculino tentou nos últimos anos “conseguir algún patrocinio de relevancia, con grandes empresas da cidade, que finalmente non frutificaron, e isto provoca que cada ano sexa máis complicado pechar as tempadas economicamente, e que os éxitos deportivos non vaian parellos do recoñecemento ou apoio de empresas privadas”.
É por iso, que para esta nova tempada 2021-2022, o club deseñou un plan de co-patrocinadores, onde din que tratarán de “xerar sinerxias cos autónomos, pequenas e medianas empresas da provincia, para poder facer crecer en potencial económico ao club, e á súa vez devolver a estas empresas un retorno publicitario relevante para a súa actividade”.
As equipacións deportivas, o principal soporte publicitario
O principal soporte de visibilidade para esta nova tempada serán os equipamentos. O primeiro equipo lucirá na Segunda RFEF Futsal Feminino a imaxe dos co-patrocinadores tanto en camiseta como pantalón, explican desde o do Viaxes Amarelle FSF. Tamén detallan que “a imaxe desas firmas co-patrocinadoras se incluirían na cartelería do club, web, redes sociais, lonas do pavillón de xogo, así como durante a emisión en streaming dos partidos que se xoguen como local”.
Desde o do Viaxes Amarelle FSF aseguran que “Calquera autónomo ou empresa pode unirse á campaña de co-patrocinadores do club, incluíndo a súa imaxe nos equipamentos do primeiro equipo desde 1.750 €uros para a presente tempada 2021-22”. Falan incluso de “facilidades de pago que o club ofrece de repartir o pago en 3 cotas”.
As empresas interesadas, poden contactar coa entidade nos teléfonos 685 30 35 38 (Jose), 625 58 15 75 (Carlos); ou ben, no correo electrónico do club, patrocinadores@amarellefsf.com.
