O Victoria FC e o Viajes Interrías afrontan dous duelos moi importantes. As santiaguesas queren gañar para poder optar polo posto de bronce, mentres que o líder Interrías buscará unha vitoria en San Pedro para seguir no máis alto da táboa. As de Villalonga xogan o vindeiro sábado ás 17:00 horas no Municipal de San Pedro mentres que o Victoria FC farán o propio no Carlos Alonso Santillana o vindeiro domingo ante o Oceja ás 12:15.
Obxectivo, entrar no podio
O Victoria FC afronta a 18.ª xornada de Liga en 1.ª Nacional Femenina co obxectivo de manter as boas sensacións do último encontro na casa ante o Sárdoma (3-1) e non perder a ocasión de superar ao Dépor B se o conxunto herculino cae na visita ó Oviedo Moderno B (5.º).
As santiaguesas ocupan a terceira posición da táboa co Dépor B —ambos con 33 puntos e idénticas estadísticas en canto a triunfos (10), empates (3) e derrotas (4) así coma en goles a favor (39) e en contra (16) — O adestrador compostelán, Chivi García mantén para a visita ó Oceja as baixas de Carmen, Carlita, Choren e Noelia Moure, pero a boa nova é que Albita volve a unha convocatoria despois de varios meses afastada por culpa de unha lesión.
O técnico confía nas súas xogadoras de cara a este importante encontro porque considera que “o equipo leva unha liña ascendente no seu xogo dende o parón de Nadal”. “Sabemos que este partido é unha final para nós se queremos meter presión ó líder (Viajes Interrías Fútbol Femenino que ten 41 puntos) que visitará Santa Isabel na seguinte xornada”, recorda.
Chivi García, adestrador do Victoria FC: “Sabemos que este partido é unha final para nós se queremos meter presión ó líder que visitará Santa Isabel na seguinte xornada”.
Chivi García falou do Oceja coma un rival “moi intenso, que presiona en campo contrario e non deixa ós equipos elaborar o seu xogo coma local polas dimensións do mesmo”. “Ven de empatar na casa contra o Dépor (0-0) e iso demostra que non nos podemos deixar levar pola súa situación na clasificación. Será un partido moi disputado”, adianta.
Chivi García, adestrador do Victoria FC: “O Oceja é un equipo moi intenso, que presiona en campo contrario e non deixa ós equipos elaborar o seu xogo coma local polas dimensións do mesmo”.
En canto ás claves da cita, o adestrador do Victoria FC sinala unha vez máis “a intensidade coa que saiamos a disputar o partido. Os balóns nas segundas xogadas serán importantísimos nun partido destas características e sobre todo o xogo a balón parado. Estamos a conseguir goles a balón parado importantes, é algo no que o equipo mellorou moitísimo con respeto á primeira volta”, insiste.
Chivi García, adestrador do Victoria FC: “Estamos a conseguir goles a balón parado importantes, é algo no que o equipo mellorou moitísimo con respeto á primeira volta”.
O líder quere dar un golpe na mesa
O Viajes Interrías fixo bo o empate da pasada xornada fronte Dépor B en Abegondo debido ao traspés do Monte na casa do Gijón Fútbol feminino. As de Villalonga sacan tres puntos ao Monte e esperan acadar unha vitoria na casa para seguir no máis alto da táboa.
Luis Treviño, adestrador do Viajes Interrías: “O Sporting B é o equipo que vén sen presión xa que seguramente perdan a categoría debido ao descenso do Sporting desde a Reto”.
As de Treviño chegan ao partido tras catro partido consecutivos sen coñecer a derrota e buscarán dedicar unha vitoria a súa afección. As galegas terán un ollo posto no que suceda en Santander no duelo entre o Monte e o Atlético Arousana na espera dun favor por parte das amarelas.
Luis Treviño, adestrador do Viajes Interrías: “O Sporting ten xogadoras tecnicamente moi boas e xa na ida puxéronnolo moi difícil. Unha vez máis, nós temos que afrontar o partido coas nosas fortalezas”.
O filial sportinguista tamén chega ao duelo con boas sensacións tras facer pleno e acumular seis puntos nas últimas dúas xornadas. Sen dúbida un duelo de altura no novo San Pedro.
Luis Treviño, adestrador do Viajes Interrías: “Temos que pechar a hemorraxia de goles e fortalecer nosa defensa”.
