Nunha batería de preguntas curtas a futbolista galega do Utah Royals FC, Vero Boquete, cóntanos cousas como cal é o título que lle soña con gañar ou cal é o que máis aprecia dos que xa ten acadado na súa traxectoria deportiva. Tamén confesa en que canchas lle gustaría disputar un partido de fútbol, que xogadora sería o seu referente actual na Liga Iberdrola se fose agora unha nena e saberemos tamén cal é o monumento que considera que ninguén debe perderse se visita Galicia.
A cambio, desde o equipo de As Nosas dámoslle á receita contra a morriña. Adiviñades cal é?
– As Nosas: Empezamos forte: Polbo ou empanada? Que elixirías?
Vero Boquete: As dúas. Non se pode elixir. A empanada de polbo encántame así que aí xa poderiamos facer a unión. A miña celebración de goles é coa man na cara simbolizando un polbo galego. Así que empanada de polbo.
– As Nosas: Un lugar para perderse?
Vero Boquete: Porto do Son. É o meu sitio especial. Veraneo alí. Son de Santiago pero unha parte de min séntese do Son.
As Nosas: Un monumento galego que as persoas que veñan a Galicia non poden deixar de ver?
Vero Boquete: A Catedral. Non podo dicir outro que non sexa ese. Non só porque son de Santiago, se non por que realmente creo que é unha marabilla comparada con outras catedrais doutras cidades que tiven a ocasión de ver.
– As Nosas: O club que marcou a túa vida?
Vero Boquete: O Español. Deume a oportunidade de crecer ao máximo nivel, abriume as portas para poder saír e poder ser quen son hoxe en día.
– As Nosas: Unha cancha na que aínda soñas con xogar un partido de fútbol?
Vero Boquete: Encantaríame xogar nun dos grandes estadios españois, Bernabeu, Camp Nou, Riazor, non só porque eu estea aí se non porque abriría as portas a un partido de fútbol feminino.
– As Nosas: Que título que aínda non tes, queres meter na saca?
Vero Boquete: A Liga americana. Por iso volvín a Estados Unidos. Realmente é o meu reto. Este ano estarei unha tempada máis alí. Téñoo en mente hai tempo. Perdín unha final nos penaltis… Para min sería un título importante na miña carreira.
– As Nosas: E dos títulos que xa tes, con cal te quedas? Ás veces non é o máis importante deportivamente falando, se non o que máis custou gañar polo esforzo que supuxo.
Vero Boquete: A Champions. Durante moitos anos movinme para poder xogar esa competición e conseguila. Un ano perdín a final e ao seguinte xogueina e gañeina. Era o gran soño. Sempre creces con partidos da Champions. E a nivel de clubs é o título máis importante.
– As Nosas: Se tiveses que elixir unha futbolista da Liga Iberdrola cal sería o referente da Vero Boquete que tivese sete anos agora?
Vero Boquete: Cada vez temos xogadoras mellores. Exemplos hai moitos e depende das posicións. Pero unha xogadora que me gusta moito e que é un referente a nivel español, é Jenni Hermoso. Ademais xogamos xuntas na Selección, no París Sant Germain e en Suecia. Para min é unha xogadora especial.
“Unha xogadora que me gusta moito na Liga Iberdrola e que é un referente a nivel español, é Jenni Hermoso”.
– As Nosas: Es morriñenta?
Vero Boquete: Como boa galega teño que selo e non pasa cos anos. Levo moito tempo fóra e segue estando aí.
As Nosas: Sabes como se cura… Volvendo. A ver se non só te vemos no Nadal. A ver se a Liga Iberdrola medra tanto como para ofrecer condicións profesionais e retos deportivos e temos a Vero Boquete de volta en Galicia loitando por retos nacionais e internacionais.
Vero Boquete: Esperemos que si.
